Latest News

ઉમેદવારો ફોર્મ લેવાં માટે કલેક્ટર કચેરી પહોંચ્યા, લોકશાહીના પર્વમાં વડોદરા બેઠક પર રાજકીય ગરમાવો વધ્યો

(પ્રતિનિધિ), વડોદરા. તા.6

વડોદરા :- ગુજરાતમાં આગામી ચૂંટણીને લઈને રાજકીય પારો ચરમસીમાએ પહોંચ્યો છે, ત્યારે વડોદરામાં પણ ‘ચૂંટણી જંગ’ બરાબરનો જામ્યો છે. ઉમેદવારી પત્ર ભરવાના અંતિમ દિવસો નજીક આવતા જ આજે વડોદરા કલેકટર કચેરી ખાતે ઉમેદવારોનો ધસારો જોવા મળ્યો હતો. સવારથી જ કલેકટર કચેરી પરિસર માં ઉમેદવારી ફોર્મ લેવા માટે ઉમેદવારોની અવરજવર વધી હતી.

ભાજપ, કોંગ્રેસ અને આમ આદમી પાર્ટીના ઉમેદવારોએ વિજય મુહૂર્તમાં પોતાના નામાંકન પત્રો લેવા માટે કલેક્ટર કચેરી ખાતે પહોંચ્યા હતા. માત્ર મુખ્ય પક્ષો જ નહીં, અપક્ષ ઉમેદવારોએ પણ ચૂંટણી મેદાનમાં ઝંપલાવતા આ વખતે વડોદરાનો જંગ રસપ્રદ બનવાના સંકેતો મળી રહ્યા છે. આ માટે જિલ્લા ચૂંટણી અધિકારી અને કલેકટર દ્વારા ફોર્મ આપવા માટે અને ભરેલા ફોર્મ સ્વીકારવાની પ્રક્રિયા માટે વિશેષ ટીમો તૈનાત કરવામાં આવી છે, જેથી કોઈ ક્ષતિ ન રહી જાય.

આગામી દિવસોમાં ભરાયેલા ફોર્મની ચકાસણી કરવામાં આવશે, ત્યારબાદ જ ચિત્ર સ્પષ્ટ થશે કે વડોદરાના રણમેદાનમાં કેટલા મહારથીઓ આમને-સામને ટકરાશે. હાલ તો વડોદરાની જનતામાં પણ ચૂંટણીને લઈને ભારે ઉત્સુકતા જોવા મળી રહી છે.