Latest News

સુરતની ટ્રાફિકની સમસ્યા દૂર કરવા પોલીસ કમિશનર રસ્તા પર ઉતર્યા, નર્મદ યુનિવર્સિટીની બહાર કુલપતિએ જોડ્યા હાથ
સુરતઃ શહેરમાં વસતીની સાથે વાહનોની સંખ્યા દિનપ્રતિદિન વધી રહી છે, જેના લીધે શહેરમાં ટ્રાફિકની સમસ્યા માથાના દુઃખાવા સમાન બની ગઈ છે.

ટ્રાફિક સિગ્નલનું પાલન થઈ રહ્યું હોવા છતાં ટ્રાફિકની સમસ્યા ઓછી થઈ નથી. લોકો પણ ટ્રાફિકથી પરેશાન છે. મેટ્રોના કારણે રસ્તાઓ સાંકડા થયા છે બીજી તરફ સિગ્નલની પર ઉભા રહેવાના લીધે સમય વેડફાઈ રહ્યો છે. આવા સમયે લોકોની લાગણીઓને વાચા આપવા માટે સુરત પોલીસ કમિશનર રસ્તા પર ઉતર્યા હતાં. તેઓ પાલિકા સહિતના અધિકારીઓ સાથે કારગીલ ચોક ખાતે પહોંચ્યા હતાં.

રોડ પર ઉતરેલા પોલીસ કમિશનરે લોકોની વાતો સાંભળી હતી. જેમાં લોકોએ સર્કલથી લઈને બીઆરટીએસ રૂટ સહિતના પ્રશ્નોની સાથે સાથે વગર કામના અને જોઈતા ટ્રાફિક સિગ્નલો અંગે પોતાની વાત રજૂ કરી હતી. જેથી પોલીસ કમિશનરે તમામ નાગરિકોની વાત સાંભળીને રસ્તા પર જ મિટિંગ યોજી હતી. જેમાં અધિકારીઓના રોડ પર જ ક્લાસ લેવાઈ ગયા હતાં.

પોલીસ કમિશનરે ટ્રાફિક સમસ્યા હલ કરવાના આયોજનના ભાર રૂપે રસ્તા પર જ ટ્રાફિક સર્કલ નાના કરવા માટે આદેશ આપી દીધો હતો. સાથે જ બીઆરટીએસ રૂટ કાપવા અંગે પણ સૂચના આપી દીધી હતી. પોલીસ કમિશનરના આદેશના પગલે સ્થળ પર જ હાજર પાલિકાની ટીમ દ્વારા તાત્કાલિક યુદ્ધના ધોરણે કામગીરી હાથ ધરી દેવામાં આવી હતી.