ગાંધીનગર : ગુજરાતની (Gujarat) નજીકમાં ચક્રવાતી હવાના દબાણની સિસ્ટમ સક્રિય છે, જેના પગલે ગુજરાતમા હવે આગામી તા.૫મી જૂન સુધીમા વરસાદ (Rain) થવાની ચેતવણી હવામાન વિભાગ દ્વારા જાહેર કરવામાં આવી છે. ખાસ કરીને એક ચક્રવાતી હવાના દબાણની સિસ્ટમ પશ્વિમી હિમાલયની આસપાસ છે. બીજી સિસ્ટમ પાકિસ્તાન તથા તેને અડીને આવેલા પંજાબ પર સક્રિય છે. ત્રીજી સિસ્ટમ દક્ષિણ – પશ્વિમ રાજસ્થાન પર છે. જયારે ચોથી સિસ્ટમ પૂ્ર્વીય મધ્યપ્રદેશ પર સ્થિત છે. જેના પગલે ગુજરાત તેના પ્રભાવ ક્ષેત્ર હેઠળ આવી ગયું છે.
આગામી તા.૫મી જૂન સુધી ગુજરાતમાં વરસાદની સંભાવના રહેલી છે. જેમાં બનાસકાંઠા, સાબરકાંઠા, પાટણ, મહેસાણા, સુરત, વલસાડ, નવસારી, દમણ અને દાદરા નગર હવેલી સહિતના જિલ્લાઓ વરસાદથી પ્રભાવિત થશે. જો કે હવે ગુજરાતમાં પ્રિમોન્સુન એકિટવિટી થઈ રહી હોય તે રીતે વરસાદ આવી શકે છે. એટલે કે ગુજરાતમાં ૧૦મી જૂનના બદલે વહેલુ ચોમાસું બેસી જાય તેવી સંભાવના છે. આમ પણ હવામાન વિભાગે આગામી કરી છે કે ગુજરાતમાં ૧૦મી જૂનની આસપાસ ચોમાસુ બેસી જશે, જો કે તે પહેલા પ્રિમોન્સુન એક્ટિવિટી શરૂ થાય તેવી સંભાવના છે. વરસાદ દરમિયાન રાજયના આ જિલ્લાઓમાં પ્રતિ કલાકના ૩૦થી ૪૦ કિમીની ઝડપે પવન ફૂંકાઈ શકે છે. જે વધીને પ્રતિ કલાકના ૫૦ કિમીની ઝડપે ફવન ફૂંકાય તેવી પણ સંભાવના રહેલી છે.
આજે દિવસ દરમ્યાન રાજયમાં ગરમીનો પારો ૩થી ૪ ડિગ્રી સુધી વધી જવા પામ્યો હતો. જેમાં ખાસ કરીને ભાવનગરમાં ૪૨ ડિગ્રી ગરમી નોંધાવવા પામી હતી. અમદાવાદના એરપોર્ટના કેમ્પસમાં આવેલી હવામાન વિભાગની ઓફિસના સત્તાવાર સૂત્રોએ કહ્યું હતું કે , રાજયના અન્ય શહેરો પૈકી અમદાવાદમાં ૪૧ ડિ.સે.,ડીસામાં ૩૯ ડિ.સે., ગાંધીનગરમાં ૪૧ ડિ.સે., વલ્લ્ભ વિદ્યાનગરમાં ૪૧ ડિ.સે,વડોદરામાં ૪૧ ડિ.સે.,સુરતમાં ૩૮ ડિ.સે.,વલસાડમાં ૩૬ ડિ.સે.,ભૂજમાં ૩૯ ડિ.સે.,નલિયામાં ૩૫ ડિ.સે.,કંડલા એરપોર્ટ પર ૪૦ ડિ.સે.,અમરેલીમાં ૪૧ ડિ.સે.,ભાવનગરમાં ૪૨ ડિ.સે.,રાજકોટમાં ૪૧ ડિ.સે.,સુરેન્દ્રનગરમાં ૪૧ ડિ.સે., અને કેશોદમાં ૩૯ ડિ.સે., મહત્તમ તાપમાન નોંધાયુ હતું.
