ચૂંટણી પંચે (Election Commission) કેન્દ્ર સરકાર (Government) પર કડકાઈ દાખવી છે. કમિશને આજે ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયને વોટ્સએપ પર વિકસિત ભારત (Viksit Bharat) મેસેજ મોકલવાનું તાત્કાલિક બંધ કરવાનો નિર્દેશ આપ્યો છે. ચૂંટણી પંચે આ બાબતે તરત જ MeitY પાસેથી અનુપાલન રિપોર્ટ માંગ્યો છે. આ અંગે ચૂંટણી પંચને અનેક ફરિયાદો મળી હતી. પંચે આજે આ અંગે કાર્યવાહી કરી છે.
કેન્દ્રીય ચૂંટણી પંચે ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયને નિર્દેશ આપતાં કહ્યું કે આચારસંહિતા લાગુ થયા પછી પણ લોકોને વિકસિત ભારત સંબંધિત સંદેશા મળી રહ્યા છે. તેને તાત્કાલિક રોકી દેવા જોઈએ. આ અંગે કરવામાં આવેલી કાર્યવાહી અંગે ચૂંટણી પંચને જાણ કરવા પણ આદેશ આપવામાં આવ્યો છે.
MeitY પાસેથી તાત્કાલિક રિપોર્ટ માંગ્યો
EC એ IT મંત્રાલયને વોટ્સએપ પર વિકસિત ભારતના સંદેશાઓની ડિલિવરી તાત્કાલિક બંધ કરવાનો નિર્દેશ આપ્યો છે. આ બાબતે અનુપાલન રિપોર્ટ તાત્કાલિક MeitY પાસેથી માંગવામાં આવ્યો છે. સામાન્ય ચૂંટણી 2024ની જાહેરાત અને MCC લાગુ થવા છતાં હજુ પણ નાગરિકોના ફોન પર આવા સંદેશાઓ મોકલવામાં આવી રહ્યા છે તે અંગે કમિશનને ઘણી ફરિયાદો મળી હતી. જવાબમાં MeitYએ કમિશનને જાણ કરી હતી કે જો કે MCC લાગુ થયા પહેલા પત્રો મોકલવામાં આવ્યા હતા. તેમાંથી કેટલાક સિસ્ટમેટિક અને નેટવર્ક મર્યાદાઓને કારણે વિલંબ સાથે લોકોને પહોંચાડવામાં આવ્યા હોઈ શકે છે.
ઉલ્લેખનીય છે કે સરકારના IT મંત્રાલય દ્વારા લોકોના વોટ્સએપ પર ‘વિકાસ ભારત સંપર્ક’ નામથી મેસેજ મોકલવામાં આવી રહ્યા હતા જેમાં ‘PM મોદીની ગેરંટી’ નામથી એક વીડિયો પ્રસારિત કરવામાં આવી રહ્યો હતો. આ અંગે ચૂંટણી પંચને અનેક ફરિયાદો કરવામાં આવી હતી. ભાજપ સરકાર સામાન્ય ચૂંટણીની તારીખની જાહેરાત બાદ તેને આવા મેસેજ મોકલી રહી છે. સંદેશમાં લખવામાં આવ્યું હતું કે, “નમસ્કાર, આ સંદેશ પ્રધાનમંત્રી શ્રી નરેન્દ્ર મોદીની આગેવાની હેઠળની ભારત સરકારના વિકાસ ભારત સંપર્ક કેન્દ્ર દ્વારા મોકલવામાં આવ્યો છે.”
