નવી દિલ્હીઃ (New Delhi) પૂર્વ કોંગ્રેસ અધ્યક્ષ અને કેરળના વાયનાડથી સાંસદ રાહુલ ગાંધીના (Rahul Gandhi) વધુ એક નિવેદન (Statement) પર ભાજપે આકરા પ્રહારો કર્યા છે. હિન્દુ ધર્મના ‘શક્તિ’ શબ્દનો ઉલ્લેખ કરતા રાહુલ ગાંધીએ કહ્યું કે તેઓ શક્તિ (Shakti) સાથે લડી રહ્યા છે. ભાજપે તેને સનાતન ધર્મનું વધુ એક અપમાન ગણાવ્યું. રાહુલ ગાંધીના આ નિવેદન પર વડાપ્રધાન નરેન્દ્ર મોદીએ પણ પ્રતિક્રિયા આપી હતી. તેમણે કહ્યું કે હું આ પડકાર સ્વીકારીશ અને આ શક્તિ સ્વરૂપા માતાઓ અને બહેનોની સુરક્ષા માટે હું મારા જાનની બાજી લગાવી દઈશ.
રાહુલ ગાંધીએ કહ્યું હતું- હું શક્તિ સાથે લડી રહ્યો છું
વિપક્ષી ગઠબંધને રવિવારે મુંબઈના શિવાજી પાર્કથી પોતાનો ચૂંટણી ઢંઢેરો બહાર પાડ્યો હતો. તે જ પ્રસંગે રાહુલ ગાંધીએ શક્તિ વિરુદ્ધ લડવાનું નિવેદન આપ્યું હતું. તેમણે કહ્યું, ‘હિંદુ ધર્મમાં શક્તિ શબ્દ છે. આપણે શક્તિ સાથે લડી રહ્યા છીએ, એક શક્તિ સાથે લડી રહ્યા છીએ. રાહુલે કહ્યું, ‘હવે સવાલ એ થાય છે કે એ શક્તિ શું છે? જેમ કે અહીં કોઈએ કહ્યું – રાજાનો આત્મા EVMમાં છે. સાચેજ રાજાનો આત્મા EVMમાં છે. તે ભારતની દરેક સંસ્થામાં છે. તે EDમાં છે, તે CBIમાં છે, તે આવકવેરા વિભાગમાં છે.
બીજી તરફ વડાપ્રધાને તેલંગાણાના જગતિયાલમાં સભાને સંબોધિત કરતા રાહુલ ગાંધીના નિવેદનનો જવાબ આપ્યો હતો. બેઠકમાં મોટી સંખ્યામાં ઉપસ્થિત મહિલાઓને સંબોધતા પીએમએ કહ્યું કે INDI ગઠબંધને તેનો મેનિફેસ્ટો બહાર પાડ્યો છે. તેમણે કહ્યું છે કે તેમની લડાઈ શક્તિની વિરૂદ્ધ છે. મારા માટે દરેક માતા શક્તિનું સ્વરૂપ છે, દરેક પુત્રી શક્તિનું સ્વરૂપ છે. માતાઓ અને બહેનો, હું તમને શક્તિ તરીકે પૂજું છું. હું ભારત માતાનો ઉપાસક છું. હું તમારી શક્તિ સ્વરૂપ માતાઓ, બહેનો અને પુત્રીઓનો ઉપાસક છું.
મોદીએ કહ્યું કે INDI ગઠબંધનએ ગઈકાલે શિવાજી પાર્કમાંથી જારી કરેલા તેના મેનિફેસ્ટોમાં શક્તિને નાબૂદ કરવાની જાહેરાત કરી છે. હું આ પડકાર સ્વીકારું છું અને આ શક્તિ સ્વરૂપા માતાઓ અને બહેનોની સુરક્ષા માટે હું મારો જીવ આપી દઈશ. એક તરફ એવા લોકો છે જેઓ શક્તિના વિનાશની વાત કરે છે, તો બીજી બાજુ એવા લોકો છે જેઓ શક્તિની ઉપાસના કરે છે. કોણ શક્તિનો નાશ કરી શકે છે અને કોણ શક્તિના આશીર્વાદ મેળવી શકે છે તે મુકાબલો 4 જૂને થઈ જશે.
બીજી તરફ ભાજપના નેતાઓએ રાહુલના આ નિવેદનની નિંદા કરવાનું શરૂ કર્યું છે. ભાજપના નેતાઓએ કહ્યું કે સનાતન ધર્મ અને હિંદુઓનું અપમાન કરવું એ કોંગ્રેસના નેતૃત્વમાં વિપક્ષી ગઠબંધનનો સ્વભાવ બની ગયો છે. પાર્ટીના પ્રવક્તા શહેઝાદ પૂનાવાલાએ કહ્યું કે રાહુલ ગાંધી DMK નેતા ઉધયનિધિ સ્ટાલિનની જેમ સનાતન વિરુદ્ધ બોલી રહ્યા છે.
