ક્રિએટિવિટી !!!!… કોને ના ગમે ? અને એમાંય છેલ્લાં બે વર્ષથી બાળકો ઘરે રહેવા મજબૂર બન્યાં હતા, એ સમયગાળામાં ઘણાય બાળાકોએ સમયનો સદુપયોગ કરીને પોતાની ક્રિએટિવિટીને વિકસાવી છે. 22 ઓગસ્ટે રક્ષાબંધન આવી રહી છે ત્યારે પોતાની લાગણીની સાથે ક્રિએટિવિટી વાપરીને છોકરીઓ અનોખી રાખડી કે આરતીની થીમ બેઝ થાળી ડેકોરેશન કરી રહી છે તો ભાઈઓ પણ પોતાની બહેનને આપવા ગિફટ્સ કે કાર્ડ બનાવી રહ્યાં છે.
ડેકોરેટેડ થાળી વીથ સેન્સર
રક્ષાબંધનમાં બહેન ભાઈને કંકુનો ચાંદલો અને આરતી કરવા માટે થાળી શણગારે છે. દિપા પટેલે પોતાના ભાઈ માટે યુનિક આરતીની થાળી તૈયાર કરાવી છે. તેણે જણાવ્યું હતું કે આ થાળીમાં વચ્ચે સેન્સર ફીટ કરેલું હોય છે. મોબાઈલ વડે આ સેન્સર પર સ્કેન કરવાથી ભાઈ બહેનના ફોટો અને વિડીયો મોબાઈલમાં ખૂલે છે. બહેન પોતાના ભાઈ સાથેની યાદગીરી સાચવવા માટે આ પ્રકારની સ્કેનર વાળી થાળી સજાવી રહી છે. માર્કેટમાં પણ આ પ્રકારની થાળી જોવા મળી રહી છે.
રાખી વીથ હાર્ટ બીટ
રક્ષાબંધનમાં માર્કેટમાં હાલ હાર્ટ બીટ રાખડીનો ટ્રેન્ડ જોવા મળી રહ્યો છે. જેમાં સેન્સર ફીટ કરવામાં આવ્યું છે. બહેન ભાઈને રાખડી બાંધે છે અને ભાઈ બહેનને ગિફ્ટમાં હાથમાં પહેરવાનું બ્રેસલેટ આપે છે. આ બંનેમાં સેન્સર ફીટ કરેલા છે અને બંનેને એકબીજા સાથે કનેક્ટ કરેલા છે. આથી જો ભાઈની હાર્ટબીટમાં કંઈ ફેરફાર થાય તો બહેન તેનો અનુભવ કરી શકે છે. જો હાર્ટબીટ બંધ થઈ જશે તો તેમાં રહેલી ડિજીટલ વોચ પણ બંધ થઈ જશે. માર્કેટમાં રક્ષાબંધન પર આ પ્રકારની રાખડી ટ્રેડીંગ છે.
કપૂર, અજમા અને તુલસીનો ઉપયોગ કરીને રાખડી બનાવી : હેત્વી પાંડવ
11 વર્ષીય હેત્વી જણાવે છે કે, ‘’ આ વર્ષે હું બજારમાંથી રાખડી નથી ખરીદવાની, કેમ કે સ્કૂલમાં ફેન્સી રાખી મેકિંગની સ્પર્ધા પરથી મને એક આઇડિયા આવ્યો કે હું મારા ભાઈ માટે કપૂર, અજમા અને તુલસીનો ઉપયોગ કરીને રાખડી બનાવું. કેમ કે મારો ભાઈ ટ્યુશન જાય છે ત્યારે તેને કપૂર અને અજમો બાંધીને જ જવું પડે છે, તો મેં વિચાર્યું કે હું એના માટે આવી જ ક્રિએટિવ રાખડી બનાવું. જેના માટે મેં અજમા અને કપૂરની પોટલી બનાવી અને તેના ઉપર તુલસીના પાનનું ડેકોરેશન કરીને રાખડી બનાવીશ.’’
