જમ્મુ-કાશ્મીરના ગાંદરબલ જિલ્લાના ગુંદ વિસ્તારમાં સુમ્બલ બાલા નજીક પ્રવાસીઓથી ભરેલી ટેમ્પો ટ્રાવેલરનો અકસ્માત સર્જાતાં 18 લોકો ઘાયલ થયા હતા. મંગળવારે 11 નવેમ્બરના રોજ SSG રોડ પર બનેલી આ ઘટનાને પગલે સ્થાનિક તંત્ર અને સુરક્ષા એજન્સીઓ તાત્કાલિક હરકતમાં આવી હતી. તમામ ઘાયલોને સારવાર માટે ગુંદના પ્રાથમિક આરોગ્ય કેન્દ્ર (PHC) ખાતે ખસેડવામાં આવ્યા હતા. ઘાયલોમાં ગુજરાતના અમદાવાદ અને સુરતના પ્રવાસીઓનો પણ સમાવેશ થાય છે.
PHC ગુંદ ખાતે તબીબોએ તમામ ઘાયલોની તપાસ કરી પ્રાથમિક સારવાર આપી હતી. ઇજાઓની ગંભીરતાના આધારે દર્દીઓનું વર્ગીકરણ કર્યા બાદ આઠ પ્રવાસીઓને વધુ સારવાર માટે શ્રીનગરની SKIMS સૌરા હોસ્પિટલમાં રિફર કરવામાં આવ્યા હતા. બાકીના 10 ઘાયલોને PHC ગુંદ ખાતે દાખલ કરીને તબીબી નિરીક્ષણ હેઠળ રાખવામાં આવ્યા છે. અત્યાર સુધી આ અકસ્માતમાં કોઈનું મૃત્યુ થયું હોવાની નોંધ નથી.
SKIMS સૌરા ખાતે રિફર કરાયેલા આઠ પ્રવાસીઓમાં ગુજરાતના પાંચ લોકોનો સમાવેશ થાય છે. અમદાવાદનાં 58 વર્ષીય શારદા રાની, 52 વર્ષીય રમેશ જી અને 50 વર્ષીય શોભના પટેલને ગંભીર ઇજાઓ થતાં વધુ સારવાર માટે ખસેડવામાં આવ્યા છે. આ ઉપરાંત અમદાવાદના રાજેશ કુમાર અને સુરતના 42 વર્ષીય જયેશનો પણ આ યાદીમાં સમાવેશ થાય છે. જયેશ સુભાષ ચંદ્રના પુત્ર હોવાનું જણાવાયું છે. શારદા રાની રમેશ જીનાં પત્ની છે, જ્યારે શોભના પટેલ રાજેશ કુમાર પટેલનાં પત્ની છે.
ગુજરાત ઉપરાંત પશ્ચિમ બંગાળના પ્રવાસીઓ પણ આ અકસ્માતમાં ઘાયલ થયા છે. મુર્શિદાબાદનાં 24 વર્ષીય સ્વપ્નદ્યુતિ ઘોષ અને 48 વર્ષીય માલા ઘોષને પણ SKIMS સૌરા ખાતે રિફર કરવામાં આવ્યા છે. તેમની સાથે પશ્ચિમ બંગાળના 61 વર્ષીય સુરજીત ઘોષને પણ વિશેષ સારવાર માટે ખસેડવામાં આવ્યા છે. આઠેય દર્દીઓની ઓળખ અને સંબંધિત વિગતો તંત્ર દ્વારા નોંધવામાં આવી છે.
હાલમાં 10 ઘાયલો PHC ગુંદ ખાતે તબીબી દેખરેખ હેઠળ છે, જ્યારે આઠ દર્દીઓની સારવાર SKIMS સૌરા ખાતે ચાલી રહી છે. અકસ્માતમાં વાહનને કેટલું નુકસાન થયું છે તેની વિગતો હજુ સામે આવી નથી. અકસ્માત કયા કારણોસર સર્જાયો તેની તપાસ પણ બાકી છે. જિલ્લા વહીવટીતંત્ર અને આરોગ્ય વિભાગ દ્વારા ઘાયલોની સ્થિતિ પર નજર રાખવામાં આવી રહી છે.
