નવી દિલ્હીઃ (New Delhi) વાહન નિર્માતા કંપની ટોયોટા કિર્લોસ્કર મોટરે (Toyota Kirloskar Motor) વર્ષ 2022માં મોટી સફળતા પ્રાપ્ત કરી બતાવી છે. ગયા વર્ષે કંપનીએ (Company) 10 વર્ષમાં સૌથી વધુ હોલસેલ વેચાણ નોંધાવ્યું હતું. વિક્રમ કિર્લોસ્કરના મૃત્યુ બાદ કિર્લોસ્કર જૂથે કંપનીની બાગડોર માનસી ટાટાને સોંપી દીધી છે. માનસીને કિર્લોસ્કર જોઈન્ટ વેન્ચરના બોર્ડના અધ્યક્ષ તરીકે નિયુક્ત કરવામાં આવી છે. વિક્રમ કિર્લોસ્કરનું નવેમ્બર 2022માં નિધન થયું હતું. આ પછી તેમની એકમાત્ર સંતાન માનસી કંપનીનું કામકાજ જોઈ રહી છે. માનસી ટાટા હવે ટોયોટા એન્જિન ઈન્ડિયા લિમિટેડ (TIEI), કિર્લોસ્કર ટોયોટા ટેક્સટાઈલ પ્રાઈવેટ લિમિટેડ (KTTM), ટોયોટા મટિરિયલ હેન્ડલિંગ ઈન્ડિયા પ્રાઈવેટ લિમિટેડ (TMHIN) અને Daeno Kirloskar Industries Pvt Ltd (DNKI)નું નેતૃત્વ કરી રહી છે.
32 વર્ષની માનસીએ યુએસની રોડ આઇલેન્ડ સ્કૂલ ઓફ ડિઝાઇનમાંથી ગ્રેજ્યુએશન કર્યું છે. અભ્યાસ પૂરો કર્યા પછી તેણે પિતાને કંપનીમાં મદદ કરવાનું શરૂ કર્યું હતું. વર્ષ 2019 માં તેણીએ નોએલ ટાટાના પુત્ર નેવિલ ટાટા સાથે લગ્ન કર્યા હતા. નોએલ ટાટા રતન ટાટાના સાવકા ભાઈ છે. બિઝનેસ ઉપરાંત માનસીને પેઇન્ટિંગનો પણ ઘણો શોખ છે. તેણે 13 વર્ષની ઉંમરે તેનું પ્રથમ પેઇન્ટિંગ પ્રદર્શન કર્યું હતું. ટાટા પરિવારની પુત્રવધૂ હોવા છતાં તે ખૂબ જ લો પ્રોફાઇલ જીવન જીવે છે.
જણાવી દઈએ કે કેલેન્ડર વર્ષ 2022માં કંપનીએ કુલ 1,60,357 યુનિટ્સનું વેચાણ કર્યું છે. કેલેન્ડર વર્ષ 2021માં વેચાયેલા 1,30,768 યુનિટ કરતાં આ સંખ્યા 23 ટકા વધુ છે. આમ ગયા વર્ષ દરમિયાનનું વેચાણ છેલ્લા દાયકામાં કંપનીનું સૌથી વધુ હોલસેલ વેચાણ હતું. કંપનીએ જણાવ્યું હતું કે અગાઉ તેણે 2012માં કુલ 1,72,241 એકમો સાથે વધુ વેચાણ હાંસલ કર્યું હતું. જોકે ડિસેમ્બર 2022માં TKMનું જથ્થાબંધ વેચાણ 3.8 ટકા ઘટીને 10,421 યુનિટ થયું હતું. રવિવારે એક નિવેદનમાં આ માહિતી આપતા TKMએ જણાવ્યું હતું કે કંપનીએ ડિસેમ્બર 2021માં ડીલરોને 10,834 યુનિટ્સ મોકલ્યા હતા.
TKMના એસોસિયેટ વાઈસ પ્રેસિડેન્ટ, સેલ્સ એન્ડ સ્ટ્રેટેજિક માર્કેટિંગના અતુલ સૂદે જણાવ્યું હતું કે પાછલું વર્ષ વેચાણ પ્રદર્શન તેમજ અર્બન ક્રુઝર હાઈરાઈડર અને ઈનોવા હાઈક્રોસ જેવા નવા ઉત્પાદનોના લોન્ચિંગની દ્રષ્ટિએ કંપની માટે ‘જબરદસ્ત’ રહ્યું છે. તેમણે વધુમાં ઉમેર્યું હતું કે બંને નવા મોડલને ગ્રાહકો દ્વારા ખૂબ જ સારો પ્રતિસાદ મળ્યો છે. અમે માંગમાં તેજી જોઈ રહ્યા છીએ. અમે ગ્રાહકોની જરૂરિયાતોને પહોંચી વળવા માટે પણ અમારા શ્રેષ્ઠ પ્રયાસો કરી રહ્યા છીએ. અમારી પાસે આ વર્ષની શરૂઆતમાં કેટલાક અન્ય લોન્ચ પણ છે. આમાં નવી ગ્લાન્ઝાનો પણ સમાવેશ થાય છે. તેને પણ સારો પ્રતિસાદ મળી રહ્યો છે. TKMના ફ્લેગશિપ મોડલ્સ જેમ કે ફોર્ચ્યુનર, લિજેન્ડર, કેમરી અને વેલફાયર પોતપોતાના સેગમેન્ટમાં આઉટપરફોર્મ કરવાનું ચાલુ રાખ્યું છે.
