ગયાના: વેસ્ટ ઈન્ડિઝમાં રમાઈ રહેલા T20 વર્લ્ડ કપ 2024ની બીજી સેમીફાઈનલને લઈને એક મોટું અપડેટ સામે આવી રહ્યું છે. આ બીજી સેમિફાઇનલ મેચ ભારતીય ટીમ અને ઇંગ્લેન્ડ વચ્ચે આજે તા. 27 જૂન ગુરુવારના રોજ ગયાનાના પ્રોવિડન્સ સ્ટેડિયમમાં રમાશે. આ શહેરમાં આજે વરસાદની પુરી શક્યતા છે.
પરંતુ ચાહકોને જણાવી દઈએ કે ઈન્ટરનેશનલ ક્રિકેટ કાઉન્સિલ (ICC) એ આ બીજી સેમીફાઈનલ માટે રિઝર્વ ડે નથી રાખ્યો. તેના બદલે 250 મિનિટ (4 કલાક 10 મિનિટ)નો વધારાનો સમય આપવામાં આવ્યો છે. પરંતુ જો આ સમયની અંદર પણ મેચ શક્ય ન બને તો તેને રદ કરવી પડશે.
જ્યારે ICCએ T20 વર્લ્ડ કપ 2024ની પ્રથમ સેમિફાઇનલ મેચ માટે રિઝર્વ ડે રાખ્યો હતો. જોકે તેની જરૂર પડી ન હતી અને દક્ષિણ આફ્રિકાએ અફઘાનિસ્તાનને હરાવી ફાઇનલમાં પ્રવેશ કર્યો હતો. હવે પ્રશંસકોના મનમાં આ પ્રશ્ન ચોક્કસપણે ઉદ્ભવે છે કે ICCએ બીજી સેમિફાઇનલ માટે રિઝર્વ ડે કેમ ન રાખ્યો? હવે આઈસીસીએ પોતે જ આનો જવાબ આપ્યો છે.
આઈસીસીના પ્રવક્તાએ કહ્યું કે બીજી સેમીફાઈનલમાં રિઝર્વ ડે ન રાખવાનો નિર્ણય એટલા માટે લેવામાં આવ્યો હતો કે ટીમોને સતત મુસાફરી ન કરવી પડે. તેણે કહ્યું, આ નિર્ણય ટીમોના પ્રદર્શનને ધ્યાનમાં રાખીને લેવામાં આવ્યો છે, જેથી ટીમોને સતત ‘ગેમ-ટ્રાવેલ-ગેમ’ ન કરવી પડે. તેણે કહ્યું, બીજી સેમીફાઈનલ માટે વધારાનો સમય (4 કલાક 10 મિનિટ) રાખવાનો નિર્ણય લેવામાં આવ્યો છે. કારણ કે આ મેચ સવારે 10.30 વાગ્યે (વેસ્ટ ઈન્ડિઝના સમય મુજબ) શરૂ થશે.
તમને જણાવી દઈએ કે T20 વર્લ્ડ કપ 2024 ની પ્રથમ સેમિફાઇનલ 26 જૂનની રાત્રે ત્રિનિદાદમાં સ્થાનિક સમય મુજબ એટલે કે ભારતીય સમય અનુસાર 27 જૂનની સવારે રમાઈ હતી. જ્યારે ભારત અને ઈંગ્લેન્ડ વચ્ચે સેમીફાઈનલ 27 જૂને સ્થાનિક સમય અનુસાર સવારે 10.30 વાગ્યે એટલે કે ભારતીય સમય અનુસાર રાત્રે 8 વાગ્યે રમાશે.
આવી સ્થિતિમાં, પ્રથમ સેમિફાઇનલ માટે રિઝર્વ ડે રાખવામાં આવ્યો હતો, જેથી તે 27 જૂન (સ્થાનિક સમય) ના રોજ યોજાઈ શકે. પરંતુ બીજી સેમિફાઇનલમાં આ શક્ય નથી. જો બીજી સેમીફાઈનલ રિઝર્વ ડે એટલે કે 28મી જૂને યોજાશે, તો આ મેચ જીતનારી ટીમે બીજા જ દિવસે એટલે કે 29મી જૂને ફાઈનલ રમવા માટે બાર્બાડોસ જવું પડે.
આવી સ્થિતિમાં બીજી સેમિફાઇનલની વિજેતા ટીમે ઘણો પ્રવાસ કરવો પડે. આ ઉપરાંત તે ટીમને પ્રેક્ટિસ કરવાનો મોકો પણ મળે નહીં. તે ટીમે સેમિફાઇનલ રમ્યા બાદ તરત જ બાર્બાડોસ જવા રવાના થવું પડે અને ખેલાડીઓ કદાચ ઊંઘી પણ શકે નહીં. આ જ કારણ છે કે ICCએ રિઝર્વ ડેને બદલે વધારાનો સમય રાખ્યો છે.
