ઔરંગાબાદ: આજે ગુરુવારે દેશભરમાં રામનવમીના પર્વની ઉજવણી કરવામાં આવી રહી છે ત્યારે મહારાષ્ટ્રના ઔરંગાબાદમાં તણાવભર્યું વાતાવરણ છે. અહીં બુધવારની રાત્રે બે જૂથ વચ્ચે હિંસા ફાટી નીકળી હતી, જેના લીધે માહોલ તંગ બન્યો છે. મોડી રાત્રે ધાર્મિક સ્થળની બહાર એક જૂથ દ્વારા અનેક વાહનોને આગ ચાંપી દેવામાં આવી હતી. પત્થરમારો કરાયો હતો, જેના લીધે પોલીસ દ્વારા ચુસ્ત બંદોબસ્ત ગોઠવી દેવામાં આવ્યો છે.
બુધવારે રાત્રે મહારાષ્ટ્રના છત્રપતિ સંભાજીનગર (જૂનું નામ ઔરંગાબાદ)ના કિરાડપુરા વિસ્તારમાં બે જૂથો વચ્ચે અથડામણ થઈ હતી. લોકોએ એકબીજા પર પથ્થરમારો કર્યો. ધાર્મિક સ્થળની બહાર અનેક વાહનોને આગ ચાંપી દેવામાં આવી હતી. પરિસ્થિતિને કાબૂમાં લેવા પોલીસ પહોંચી ત્યારે ટોળાએ પથ્થરમારો કર્યો હતો. પોલીસના વાહનોને આગ ચાંપી દેવામાં આવી હતી. હુમલામાં બે પોલીસકર્મીઓ સહિત પાંચથી છ લોકો ઘાયલ થયા હતા. હિંસા રાત્રે 11.30 વાગ્યે શરૂ થઈ અને 3.30 વાગ્યા સુધી ચાલુ રહી હતી.
છત્રપતિ સંભાજીનગર પોલીસ કમિશનર નિખિલ ગુપ્તાએ જણાવ્યું કે કિરાડપુરામાં રાત્રે તંગદિલી સર્જવાનો પ્રયાસ કરનારા તોફાનીઓને પકડવા માટે પોલીસે 8થી 10 ટીમો બનાવી છે. આ વિસ્તારમાં 3500થી વધુ જવાન તૈનાત કરવામાં આવ્યા છે. કેટલાક વિસ્તારોમાં માર્ચ પણ કરવામાં આવી છે. લોકોને અફવાઓ પર ધ્યાન ન આપવાની પણ અપીલ કરવામાં આવી છે.
જાણો શું હતો મામલો?
આજે એટલે કે ગુરુવારે મનાવવામાં આવેલી રામનવમી નિમિત્તે શહેરના અનેક વિસ્તારોમાં કાર્યક્રમોનું આયોજન કરવામાં આવ્યું હતું. કિરાડપુરા બસ્તી સ્થિત રામ મંદિરમાં પણ તૈયારીઓ ચાલી રહી હતી. રાત્રે 11.30 વાગ્યાની આસપાસ યુવાનોનું ટોળું મંદિર તરફ જઈ રહ્યું હતું. અહીં તેની અન્ય જૂથ સાથે લડાઈ થઈ અને દલીલ વધી ગઈ. બંને જૂથોમાં ગાળો બોલવા લાગી અને તે સૂત્રોચ્ચારમાં ફેરવાઈ ગઈ.
થોડીવાર પછી એક જૂથે મંદિર તરફ પથ્થરમારો કર્યો. કેટલાક લોકો પોતાનો જીવ બચાવવા મંદિરમાં ઘુસ્યા, તેમના પર પણ હુમલો કરવામાં આવ્યો. લોકોએ પોલીસને ફોન કર્યો, પરંતુ પોલીસ આવી ત્યાં સુધીમાં તો આગચંપી શરૂ થઈ ચૂકી હતી. તોફાનીઓએ મંદિરની સામે પાર્ક કરેલી પોલીસની ગાડીને આગ ચાંપી દીધી હતી.
ભીડને કાબૂમાં લેવા માટે કેટલાક ધાર્મિક નેતાઓને બોલાવવામાં આવ્યા હતા. પરંતુ ભીડ તેમની વાત સાંભળવા તૈયાર ન હતી. થોડી જ વારમાં વરિષ્ઠ પોલીસ અધિકારીઓ સહિત ભારે દળ ઘટનાસ્થળે પહોંચી ગયું હતું. તોફાનીઓએ તેમના પર પણ પથ્થરમારો કર્યો હતો અને કારના કાચ તોડી નાખ્યા હતા. પોલીસે લાઠીચાર્જ કરીને ભીડને વિખેરી નાખી હતી. ટીયર ગેસના શેલ પણ છોડ્યા. તોફાનીઓએ ફાયર બ્રિગેડની ગાડીઓ પર પાણી પણ ફેંક્યું હતું.
