ઈરાન સાથે ચાલી રહેલા યુદ્ધ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે એક મોટું નિવેદન આપ્યું છે. તેમણે કહ્યું કે જ્યાં સુધી ઈરાન બિનશરતી શરણાગતિ સ્વીકારે નહીં ત્યાં સુધી તેની સાથે કોઈ સોદો થશે નહીં. ટ્રમ્પે સોશિયલ મીડિયા પ્લેટફોર્મ ટ્રુથ પર લખ્યું, “જ્યાં સુધી ઈરાન બિનશરતી શરણાગતિ સ્વીકારે નહીં ત્યાં સુધી તેની સાથે કોઈ સોદો થશે નહીં. અમે એક મહાન અને સ્વીકાર્ય નેતા પસંદ કરીશું અને ઈરાનને વિનાશના આરેથી પાછું લાવવા માટે અથાક મહેનત કરીશું.” ડોનાલ્ડ ટ્રમ્પે ઈરાનના આગામી સુપ્રીમ લીડર માટે પસંદગી પ્રક્રિયામાં અમેરિકાને સામેલ કરવાની જરૂરિયાત પર પણ ભાર મૂક્યો.
આજે યુએસ-ઇઝરાયલ-ઈરાન યુદ્ધનો સાતમો દિવસ છે. દરમિયાન યુએસ પ્રમુખ ડોનાલ્ડ ટ્રમ્પે કહ્યું છે કે ઈરાન સાથે કોઈપણ કરાર ત્યારે જ શક્ય છે જો તે બિનશરતી શરણાગતિ સ્વીકારે. તેમણે કહ્યું કે આ પછી ઈરાનમાં એક નવું અને સારું નેતૃત્વ પસંદ કરવામાં આવશે. સોશિયલ મીડિયા પોસ્ટમાં ટ્રમ્પે કહ્યું કે જ્યાં સુધી ઈરાન બિનશરતી શરણાગતિ સ્વીકારે નહીં ત્યાં સુધી તેની સાથે કોઈ સોદો થશે નહીં. તેમણે ઉમેર્યું કે શરણાગતિ સ્વીકાર્યા પછી ઈરાનમાં વધુ સારું નેતૃત્વ પસંદ કરવામાં આવશે.
તેમણે જણાવ્યું હતું કે અમેરિકા ઈરાનની આર્થિક મજબૂતાઈને પુનઃસ્થાપિત કરવા માટે તેના સાથી દેશો સાથે કામ કરશે. ટ્રમ્પે પોતાની પોસ્ટમાં “ઈરાનને ફરીથી મહાન બનાવો (MIGA)” ના નારાનો પણ ઉપયોગ કર્યો હતો અને જણાવ્યું હતું કે ઈરાન ભવિષ્યમાં વધુ મજબૂત અને સમૃદ્ધ બની શકે છે. દરમિયાન ઈરાને ડ્રોન અને મિસાઈલોનો ઉપયોગ કરીને ઈઝરાયલી અને યુએસ બેઝ પર હુમલો કરવાનું ચાલુ રાખ્યું છે.
ઈરાન કાયમી શાંતિ માટે પ્રતિબદ્ધ
ટ્રમ્પનું નિવેદન એવા સમયે આવ્યું છે જ્યારે ઈરાને આ ક્ષેત્રમાં શાંતિની ઇચ્છા વ્યક્ત કરી છે. ઈરાનના રાષ્ટ્રપતિ મસૂદ પેઝેશ્કિયાને સોશિયલ મીડિયા પર લખ્યું હતું કે કેટલાક દેશો દ્વારા મધ્યસ્થી પ્રયાસો શરૂ કરવામાં આવ્યા છે. અમે તેમને સ્પષ્ટપણે કહેવા માંગીએ છીએ કે અમે આ ક્ષેત્રમાં કાયમી શાંતિ માટે પ્રતિબદ્ધ છીએ પરંતુ અમને અમારા દેશના સન્માન અને અધિકારોનું રક્ષણ કરવામાં કોઈ ખચકાટ નથી. ઈરાની રાષ્ટ્રપતિના આ નિવેદન બાદ ટ્રમ્પે સ્પષ્ટપણે માંગ કરી હતી કે ઈરાન બિનશરતી શરણાગતિ સ્વીકારે.
ઈરાને ઈરાકી કુર્દીસ્તાનમાં મિસાઈલ હુમલો કર્યો
ઈરાને ઈરાકી કુર્દીસ્તાન ક્ષેત્રમાં સશસ્ત્ર કુર્દીશ જૂથોના સ્થાનો પર મિસાઈલ હુમલા શરૂ કર્યા છે. ઈરાની રાજ્ય ટીવી અનુસાર આ હુમલાઓ ઈરાની વિરોધી અલગતાવાદી સંગઠનોને નિશાન બનાવીને કરવામાં આવ્યા હતા.
હોર્મુઝ સ્ટ્રેટમાં જહાજ પર ડ્રોન હુમલો
ઈરાનના સરકારી ટીવીના અહેવાલ મુજબ હોર્મુઝ સ્ટ્રેટમાં એક જહાજ ડ્રોનથી અથડાયું હતું જેના કારણે તેમાં આગ લાગી ગઈ હતી. જોકે હજુ સુધી તે સ્પષ્ટ નથી થયું કે જહાજ કયા દેશનું હતું અથવા તે કયા પ્રકારનું જહાજ હતું. ડ્રોન હુમલો કોણે કર્યો તે પણ સ્પષ્ટ નથી.
