કેટલાક માટે એક માધ્યમ ભાગ્ય બની જાય પછી એ ભાગ્ય પણ કેદ બની જાય. બીજા માધ્યમ માટે જાણે તે લાયક જ ન હોય એવું વર્તન થવા માંડે. શ્વેતા તિવારી 2001થી ટીવી શ્રેણીમાં કામ કરે છે અને ફિલ્મમાં મુખ્ય નાયિકા બની શકે એવી બ્યુટીફૂલ પણ છે, છતાં ટીવી જ તેનું ભાગ્ય છે. ટીવી જ તેના માટે કેદ છે. અલબત્ત, તેણે તેની આ સ્થિતિ સ્વીકારી લીધી છે. પણ નીના ગુપ્તાથી માંડી રીમા લાગુ ટીવી પર પણ ચાલતા અને ફિલ્મોના પણ ભાગ બન્યા. શ્વેતાને બહુ ઓછી ફિલ્મો મળી છે. કારણ એવું ય ખરું કે ટીવી સિરીયલોનું શૂટિંગ દરરોજ ચાલે છે. એમ કહી શકાય કે ત્યાં મરવાની ય ફૂરસદ નથી હોતી. ફિલ્મોમાં શૂટિંગના દિવસો ઓછા હોય પણ તેનું પ્લાનિંગ એ રીતે થતું હોય છે કે ફિલ્મ સાથે ટીવી સિરીયલો ન કરી શકો.
શ્વેતા 18 ટીવી સિરીયલો કરી ચૂકી છે. છેલ્લે ‘હમ તુમ ઔર ધેમ’માં તે શિવા તરીકે હતી અને એ જ વખતે ‘મેરે ડેડ કી દુલ્હન’માં તે ગુનીત સિકકા તરીકે આવેલી. જો કે ‘બેગુસરાઇ’ની બિંદીયા ઠાકુરે તેને ઘણી વ્યસ્ત રાખેલી. વચ્ચે તે ‘સાવધાન ઇન્ડિયા : ક્રાઇમ એલર્ટ’ શોની હોસ્ટ પણ બનેલી અને ‘કોમેડી સરકસ કી નયા દૌર’માં આવી હતી. શ્વેતા ટીવી સ્ક્રિન પર ચાલી શકે. એ બધું જ કરી શકે છે. બેઝિકલી કામથી તે હારતી નથી. પોતાને બિઝી રાખવાનું પણ તે જાણે છે. હવે તો તે શોર્ટ ફિલ્મોમાં પણ કામ કરે છે. તેની ‘પર્પલ સ્કાર્ફ’ હવે થોડો સમયમાં આવશે.
શ્વેતા હમણાં ‘ખતરોં કે ખિલાડી-11’માં ચોથી રનરઅપ રહેલી અને હવે ફેશન સંબંધિત સિરીઝ ‘શો સ્ટોપર’માં આવી રહી છે. આ શો સંદર્ભે તે ભોપાલમાં જે કાંઇ બોલી તેનાથી વિવાદ પણ ઊભો થયો હતો. ખેર, એવું તો બનતું રહે અને શ્વેતા ઉઘાડું બોલવામાં ય પાછળ પડે તેવી નથી. પરંતુ તેનાથી તેની સ્ક્રિન વેલ્યુ ઘટતી નથી, વધે છે. ‘શો સ્ટોપર’માં તેની સાથે રોહિત રોય, સૌરભ રાજ જૈન, દિગંગના સૂર્યવંશી પણ છે. ‘કસૌટી ઝિંદગી કી’ની પ્રેરણા શર્મા આ નવા શોમાં પણ પ્રેક્ષકોનાં આકર્ષણનું કેન્દ્ર બનશે.
પરંતુ એક વાત તો કહેવી જ પડે કે તે આજે પણ પ્રેક્ષકોની પ્રિય ટીવી સ્ટાર છે. ફિલ્મોમાં તે ‘મદહોશી’થી આવી હતી, પણ પંદરેક ફિલ્મો પછી ય વધારે સકસેસ ન મળ્યો. તેણે નેપાળી, પંજાબી, કન્નડ, મરાઠી ફિલ્મોમાં પણ કામ કરી જોયું. 1999માં તેણે દૂરદર્શનથી શરૂઆત કરેલી ત્યારે આટલી લાંબી કારકિર્દીની તેણે કલ્પના નહીં કરી હશે. આ દરમ્યાન તે બે વાર પરણી અને છૂટાછેડા લીધા. બે બાળકોની મા બની અને હવે તો તેની દિકરી પલક પણ મોટી થઇ ચૂકી છે અને અભિનય ક્ષેત્રે પ્રવૃત્ત છે. જોકે દિકરી સામે શ્વેતા જ આજે પણ ડિમાંડમાં છે. હા, તે ‘રોમી : ધ સેફ્રોન ચેપ્ટર’માં વિવેક ઓબેરોય સાથે ફિલ્મમાં આવી રહી છે. શ્વેતા જ આ પલકની કારકિર્દી બનાવી રહી છે. શ્વેતા સંજોગો સામે હારીને ઊભી રહી જાય એવી નથી. •
