ભારતીય શેરબજારમાં દરરોજ નવા રેકોર્ડ બની રહ્યા છે અને ગુરુવારે સપ્તાહના ચોથા ટ્રેડિંગ દિવસે બોમ્બે સ્ટોક એક્સચેન્જના 30 શેરવાળા સેન્સેક્સે ઇતિહાસ રચ્યો અને પ્રથમ વખત 79000નો આંકડો પાર કર્યો. સેન્સેક્સની જેમ નેશનલ સ્ટોક એક્સચેન્જનો નિફ્ટી 50 પણ દરરોજ નવા ઓલ-ટાઇમ હાઈ લેવલને સ્પર્શી રહ્યો છે. આજે પણ નિફ્ટી 24,000ના આંકડાની નજીક પહોંચી ગયો હતો.
શેરબજારમાં અચાનક ઉછાળો જોવા મળ્યો હતો. ગુરુવારે બજાર ખૂલતાંની સાથે જ BSE સેન્સેક્સ તેના અગાઉના 78,674.25ના બંધની સરખામણીએ નજીવા ઘટાડા સાથે 78,758.67ના સ્તરે ખૂલ્યો હતો, પરંતુ થોડો સમય સુસ્ત સ્થિતિમાં ટ્રેડિંગ કર્યા બાદ તેણે અચાનક વેગ પકડ્યો હતો અને 150થી વધુનો ઉછાળો આવ્યો હતો.
પ્રથમ વખત સેન્સેક્સ 79,000 ના સ્તરને પાર કરી ગયો. તે 79,033.91ના નવા ઓલ ટાઈમ હાઈ લેવલને સ્પર્શ્યો હતો. સેન્સેક્સની જેમ નિફ્ટીએ પણ પાછલા ટ્રેડિંગ દિવસના બંધ 23,868.80થી થોડો વધારો કરીને 23,881.55ના સ્તરે ટ્રેડિંગ શરૂ કર્યું હતું, પરંતુ પછી અચાનક તે પણ કૂદકો મારીને 23,974.70ની નવી ટોચે પહોંચ્યો હતો.
શેરબજારે નવી ઊંચાઈ હાંસલ કરી છે ત્યારે કેટલાક શેર એવા છે જેણે બજારને જબરદસ્ત ટેકો આપ્યો છે. જેમાં સૌથી મોખરે અલ્ટ્રાટેક સિમેન્ટ છે, જેનો શેર સમાચાર લખાય ત્યાં સુધી 3.16 ટકા વધ્યા બાદ રૂ. 11,502.35ના સ્તરે ટ્રેડ થઈ રહ્યો હતો. આ સિવાય JSw સ્ટીલનો શેર 1.53 ટકાના વધારા સાથે રૂ. 933.45 પર ટ્રેડ કરી રહ્યો હતો. આ સિવાય રિલાયન્સ, કોટક બેંક, એચયુએલ, ટાટા સ્ટીલ, આઈસીઆઈસીઆઈ બેંક, બજાજા ફાઈનાન્સ, એક્સિસ બેંક, ઈન્ફી, એનટીપીસી અને ટાટા મોટર્સના શેર લીલા નિશાનમાં ટ્રેડ થઈ રહ્યા હતા.
રિલાયન્સના શેર રૂ. 3000ને પાર
એશિયાના સૌથી ધનિક વ્યક્તિ મુકેશ અંબાણીની કંપની રિલાયન્સના શેર સતત બીજા દિવસે ઝડપથી ટ્રેડ થઈ રહ્યા છે અને રિલાયન્સના શેરનો ભાવ રૂ. 3000ને પાર કરી ગયો છે. જ્યારે બજાર ખુલ્યું ત્યારે RIL સ્ટોક રૂ. 3027.50 ના સ્તરે ખૂલ્યો હતો અને બજારના ઉછાળા વચ્ચે તે રૂ. 3073ના સર્વકાલીન ઉચ્ચ સ્તરે પહોંચી ગયો હતો. છેલ્લા બે દિવસથી શેરમાં ચાલી રહેલા વધારાને કારણે કંપનીનું માર્કેટ કેપિટલાઇઝેશન (રિલાયન્સ માર્કેટ કેપ) ફરી રૂ. 20 લાખ કરોડને પાર કરી ગયું છે.
