નવી દિલ્હી: ગત રાત્રે શનિવારના રોજ રશિયાએ (Russia) યુક્રેનના (Ukrain) ઝાપોરિઝિયા શહેર પર રોકેટ હુમલો (Attack) કર્યો હતો. આ હુમલામાં ઓછામાં ઓછા 17 લોકોના મોત (Death) થયાની જાણકારી મળી આવી છે. યુક્રેનના એક ટોચના અધિકારીએ આ મામલાની માહિતી આપી હતી. યુક્રેનના ઝાપોરિઝિયા શહેરમાં ગઈકાલે રાત્રે એક એપાર્ટમેન્ટ પર રશિયન હુમલામાં ઓછામાં ઓછા 17 લોકો માર્યા ગયા છે.
‘શહેર પર રોકેટ દ્વારા હુમલો કરવામાં આવ્યો હતો’
સિટી કાઉન્સિલના સેક્રેટરી એનાટોલી કુર્તાવેએ જણાવ્યું હતું કે ગઈકાલે રાત્રે શહેરમાં રોકેટ દ્વારા હુમલો કરવામાં આવ્યો હતો, જેમાં ઓછામાં ઓછા પાંચ મકાનોનો નાશ થયો હતો અને લગભગ 40 અન્યને નુકસાન થયું હતું. યુક્રેનની સેનાએ પણ હુમલાની પુષ્ટિ કરતા કહ્યું કે 12થી વઘુ લોકો ઘાયલ થયા છે. આ પહેલા શનિવારે ક્રિમીયન દ્વીપકલ્પને રશિયા સાથે જોડતા પુલ પર વિસ્ફોટ થયો હતો, જેના કારણે પુલ આંશિક રીતે પડી ગયો હતો.
ઝાપોરિઝિયાને ઘણી વખત નિશાન બનાવવામાં આવ્યા હતા
જણાવી દઈએ કે રશિયા આ પુલ દ્વારા દક્ષિણ યુક્રેનમાં યુદ્ધ માટે લશ્કરી સાધનો મોકલે છે. તાજેતરના અઠવાડિયામાં ઝપોરિઝિયાને ઘણી વખત નિશાન બનાવવામાં આવ્યા છે. તે યુક્રેન દ્વારા નિયંત્રિત વિસ્તારમાં આવે છે, જેના પર રશિયાએ ગયા અઠવાડિયે કબજો કર્યો હતો. આ પ્રદેશનો એક ભાગ હાલમાં રશિયાના કબજા હેઠળ છે. આ તે છે જ્યાં ઝપોરિઝિયા ન્યુક્લિયર પાવર પ્લાન્ટ આવેલું છે, જે યુરોપનો સૌથી મોટો પાવર પ્લાન્ટ હોવાનું કહેવાય છે.
યુક્રેનના સંરક્ષણ મંત્રાલયે દાવો કર્યો છે
ઉલ્લેખનીય છે કે, યુક્રેન સાથે લગભગ સાત મહિનાથી ચાલી રહેલા ભીષણ યુદ્ધમાં રશિયાએ ભયંકર તબાહીનો સામનો કરવો પડ્યો છે. યુક્રેનનો દાવો છે કે તેણે અત્યાર સુધીમાં 62,000 થી વધુ રશિયન સૈનિકોને મારી નાખ્યા છે. અને હજારો રશિયન યુદ્ધ વાહનોનો નાશ કરવામાં આવ્યો છે. યુક્રેનના સંરક્ષણ મંત્રાલયે રશિયાના વિનાશની યાદી જાહેર કરીને સમગ્ર વિશ્વમાં સનસનાટી મચાવી દીધી છે. જણાવી દઈએ કે યુક્રેન અને રશિયા વચ્ચે 24 ફેબ્રુઆરી 2022ના રોજ યુદ્ધ શરૂ થયું હતું.
યુક્રેનમાં કુલ 62,440 રશિયન સૈનિકો માર્યા ગયા
યુક્રેનના સંરક્ષણ મંત્રાલયે 24 ફેબ્રુઆરી 2022થી 8 ઓક્ટોબર 2022 સુધીમાં કુલ 62,440 રશિયન સૈનિકોને માર્યા હોવાનો દાવો કર્યો છે. આ સાથે 2478 ટેન્કને પણ નષ્ટ કરવાનો દાવો કરવામાં આવ્યો છે. યુક્રેનની આ જાહેરાત ચોક્કસપણે રશિયન સૈનિકોનું મનોબળ તોડી નાખશે. જોકે, રશિયાએ હંમેશા યુક્રેનના દાવાને ફગાવી દીધો છે.
