વડોદરા: શહેરના ગાજરાવાડી વચલા ફળિયામાં રહેતો રાજેશ હરગોવિંદ ઠાકોરના મકાનમાંથી મોટા પ્રમાણમાં વિદેશી દારૂનો જથ્થો વાડી પોલીસે ઝડપી પાડ્યો છે. જ્યારે દારૂનો જથ્થો મંગાવનાર શખ્સને પોલીસે વોન્ટેડ જાહેર કરી તેમની ધરપકડના ચક્રો ગતિમાન કર્યા હતા. પોલીસે 750 એમએલની 468 દારૂની બોટલો મળી કુલ રૂ,2.34 લાખની મતાનો મુદ્દામાલ કબ્જે કર્યો હતો. પોલીસે તમામ વિરુદ્ધ પ્રોહિબિશન એક્ટ હેઠળ ગુનો નોંધી વધુ તપાસ હાથ ધારી છે.
બનાવ અંગે પ્રાપ્ત થયેલી વિગતો અનુસાર શહેરના વાડી પોલીસ મથકનો સ્ટાફ સ્ટેશન વિસ્તારમાં પેટ્રોલિંગ કરી રહ્યા હતા. ત્યારે ચોક્કસ બાતમી મળી હતી કે, ગાજરાવાડી વચલા ફળિયામાં રહેતો રાજેશ હરગોવિંદ ઠાકોર મોટા પ્રમાણમાં વિદેશી દારૂનો જથ્થો લાવી પોતાના ઘરની પાછળ આવેલ જુના મુકાંમાં રાખેલ છે. જેના આધારે પોલીસે દરોડો પાડી દરોડા દરમિયાન જુના મકાનમાં તપાસ હાથ ધરી હતી. તપાસ દરમિયાન પોલીસને મોટા પ્રમાણમાં દારૂનો જથ્થો મળી આવ્યો હતો.
દરમિયાન પોલીસે મકાનમાંથી તપાસ કરતાં અલગ-અલગ બ્રાન્ડની ભારતીય બનાવટના વિદેશી દારૂનો જથ્થો ભરેલી 2.34 લાખની કિંમતની 39 પેટીઓ મળી આવી હતી. પોલીસને મકાનમાંથી 750 એમએલની 468 નંગ દારૂની બોટલ મળી આવી હતી. પોલીસની પ્રાથમિક તપાસમાં આ દારૂનો જથ્થો રાજેશ હરગોવિંદ ઠાકોર મોટા પ્રમાણમાં લાવ્યો હોવાનું બહાર આવ્યું હતું. પોલીસે મકાનમાંથી મળી આવેલા 468 નંગ દારૂની બોટલ મળી કુલરૂ. 2.34 લાખનો દારૂનો જથ્થો કબજે કર્યો હતો. અત્રે ઉલ્લેખનિય છે કે, પોલીસે ઉપરોક્ત રાજેશ હરગોવિંદ ઠાકોર (રહે. ગાજરાવાડી, ભોગીલાલ દુધવાલાની ચાલી) વિરુદ્ધ પ્રોહિબિશન એક્ટ હેઠળ ગુનો નોંધી વધુ તપાસ હાથ ધરી છે. પોલીસે રાજેશ હરગોવિંદ ઠાકોરને વોન્ટડ જાહેર કરી તેની શોધખોળ હાથ ધરી ધરપકડ કરવાના ચક્રો ગતિમાન કર્યા છે.
