સંવિધાન દિવસ નિમિત્તે રાહુલ ગાંધીએ તાલકટોરા સ્ટેડિયમમાં એક કાર્યક્રમને સંબોધિત કર્યો હતો. કોંગ્રેસ પાર્ટી દ્વારા આ કાર્યક્રમનું આયોજન કરવામાં આવ્યું હતું. જોકે રાહુલ ગાંધીએ બોલવાનું શરૂ કરતાં જ તેમનું માઈક બંધ થઈ ગયું હતું. જે બાદ પાર્ટીના નેતાઓએ સૂત્રોચ્ચાર શરૂ કર્યા હતા. ઉલ્લેખનીય છે કે રાહુલ ગાંધીએ ઘણી વખત સંસદમાં પોતાનું માઈક બંધ કરવાનો આરોપ લગાવ્યો છે. હવે રાહુલ ગાંધી પોતાની જ પાર્ટીના કાર્યક્રમમાં માઈક બંધ થઈ જતા હસતા જોવા મળ્યા હતા. તેમણે કહ્યું કે જે કોઈ દલિતો વિશે વાત કરશે તેનું માઈક બંધ થઈ જશે.
રાહુલ ગાંધીએ કહ્યું કે જ્યાં પણ અમારી સરકાર આવશે અમે ત્યાં જાતિની વસ્તી ગણતરી કરીશું. અમે તેલંગાણામાં આ કરી રહ્યા છીએ. રાહુલે દિલ્હીના તાલકટોરા સ્ટેડિયમમાં કોંગ્રેસના બંધારણ રક્ષક કાર્યક્રમ દરમિયાન આ વાત કહી હતી. વિપક્ષના નેતાના ભાષણ દરમિયાન તેમનું માઈક બંધ થઈ ગયું હતું. 6 મિનિટ પછી જ્યારે રાહુલનું માઈક ઓન થયું તો તેમણે કહ્યું કે જે કોઈ દલિતો વિશે વાત કરશે તેનું માઈક બંધ કરી દેવામાં આવશે. જો આપણે ભારતની વસ્તી ગણતરી પર નજર કરીએ તો 15% દલિત અને 15% લઘુમતીઓ છે પરંતુ કેટલા પછાત વર્ગના છે તે ખબર નથી. પછાત વર્ગ 50% થી ઓછો નથી. ભારતની 90% વસ્તી આ વર્ગોની છે.
માઈક બંધ કરો તો પણ હું બોલતો રહીશ
રાહુલે કહ્યું કે જે કોઈ આ દેશમાં 3 હજાર વર્ષથી દલિતો અને આદિવાસીઓની વાત કરે છે તેના માઈક બંધ થઈ જાય છે. ઘણા લોકો આવ્યા અને કહ્યું, જાઓ અને બેસો, મેં કહ્યું હું ઉભો રહીશ. મેં કહ્યું, તમે ઈચ્છો તેટલું માઈક બંધ કરો, હું ઉભો રહીશ અને બોલતો રહીશ.
સમગ્ર તંત્ર દલિતો, પછાત વર્ગો અને આદિવાસીઓ સામે ઉભું છે
રાહુલે કહ્યું કે અહીં પાછળ રોહિત વેમુલા જીની તસવીર છે, તેઓ બોલવા માંગતા હતા, તેઓને ચૂપ કરી દેવાયા. આદિવાસી, દલિત અને પછાત વર્ગના યુવાનો દરરોજ ડૉક્ટર-એન્જિનિયર બનવાના, મીડિયામાં જવાના, અધિકારી બનવાના સપના જુએ છે, પરંતુ સત્ય એ છે કે દેશની આખી વ્યવસ્થા પછાત વર્ગો, દલિતો અને આદિવાસીઓ વિરુદ્ધ છે. જો આવું ન થયું હોત તો મીડિયામાં ઓબીસી-દલિત વર્ગના પત્રકારો, એન્કર અને માલિકો જોયા હોત. ભારતની 200 સૌથી મોટી કંપનીઓની યાદીમાં તમને દલિત-ઓબીસી-પછાત નહીં મળે. તમને કહેવામાં આવે છે કે આ દેશ તમારો છે. આ દેશમાં તમારી હિસ્સેદારી છે, પરંતુ જો તમે ડેટા જુઓ તો તે જૂઠ સાબિત થાય છે.
સરકાર દરેક વસ્તુનું ખાનગીકરણ કરવા માંગે છે
રાહુલે કહ્યું કે તમારી સામે એક દિવાલ ઉભી છે. નરેન્દ્ર મોદી અને આરએસએસ તમારી સામે દિવાલ મજબૂત કરી રહ્યા છે. દિવાલમાં સિમેન્ટ નાંખી દેવાય છે. દરેક વસ્તુનું ખાનગીકરણ કરવામાં આવ્યું. પહેલા અહીં સરકારી શાળાઓ અને સરકારી હોસ્પિટલો હતી. આજે દલિત, આદિવાસી કે ખેડૂતને કોઈપણ સારવારની જરૂર હોય, લાખો રૂપિયા તમારા ખિસ્સામાંથી જાય છે.
