ભારતીય હોકી ટીમ ક્વાર્ટર ફાઇનલમાં પહોંચી ગઈ છે. પંજાબના સીએમ ભગવંત માન ટીમનું મનોબળ વધારવા માટે પેરિસ જવા માંગતા હતા પરંતુ કેન્દ્ર સરકારે તેમને મંજૂરી આપવાનો ઈન્કાર કરી દીધો છે.
ભારતીય હોકી ટીમ ઓસ્ટ્રેલિયાને હરાવીને ક્વાર્ટર ફાઈનલમાં પહોંચી ગઈ છે અને CM માન ક્વાર્ટર ફાઈનલ જોવા પેરિસ જવા ઈચ્છતા હતા પરંતુ સૂત્રોના જણાવ્યા અનુસાર કેન્દ્ર દ્વારા સુરક્ષાના કારણોસર તેમની મુલાકાતને મંજૂરી આપવામાં આવી નથી. મળતી માહિતી મુજબ સીએમ માન 3 થી 9 ઓગસ્ટ સુધી પેરિસ જવાના હતા અને આ માટે વિદેશ મંત્રાલય પાસેથી મંજૂરી માંગવામાં આવી હતી. હવે કેન્દ્ર દ્વારા મુખ્યમંત્રી કાર્યાલયને જણાવવામાં આવ્યું કે આ યાત્રા માટે વિદેશ મંત્રાલય દ્વારા તેઓને પરવાનગી આપવામાં આવી નથી.
સુરક્ષા કારણો ટાંકીને ના પાડી
ઉચ્ચ સ્તરીય રાજકારણીઓએ વિદેશ પ્રવાસ માટે વિદેશ મંત્રાલયની પરવાનગી લેવી પડે છે. સુરક્ષાના કારણોને ટાંકીને વિદેશ મંત્રાલયે સીએમ માનને પેરિસ જવાની પરવાનગી આપવાનો ઇનકાર કરી દીધો છે. હાલમાં ઓલિમ્પિકના કારણે પેરિસમાં સંભવિત ખતરાઓને જોતા મુખ્યમંત્રીની મુલાકાત માટે ચુસ્ત સુરક્ષાની જરૂર છે પરંતુ આટલા ઓછા સમયમાં ઝેડ પ્લસ સુરક્ષાની વ્યવસ્થા થઈ શકે તેમ નથી. જેના કારણે સીએમ માનને પેરિસ જવા દેવામાં આવ્યા નથી.
કેપ્ટન સાથે ફોન પર વાત કરી અને કહ્યું- હું તમારી સાથે છું
સીએમ ભગવંત માને ભારતીય હોકી ટીમના કેપ્ટન સાથે વાત કરી અને કહ્યું કે હું તમને પ્રોત્સાહિત કરવા આવવા માંગતો હતો પરંતુ મને રાજકીય મંજૂરી મળી નથી. હું ક્વાર્ટર ફાઈનલમાં જવાની યોજના બનાવી રહ્યો હતો પરંતુ કેન્દ્ર સરકારે કહ્યું કે હું જઈ શકું તેમ નથી. હું કદાચ પેરિસ ન આવી શકું પણ હું તમારી સાથે છું.
