નવી દિલ્હી: સ્વામી પ્રસાદ મૌર્યના (Swami Prasad Maurya) સમાજવાદી પાર્ટીમાં જોડાવાની જાહેરાત બાદ હવે ભાજપે (BJP) અખિલેશની છાવણીમાં ફૂટ પાડી છે. સિરસાગંજ વિધાનસભા ક્ષેત્રમાંથી સપાના ધારાસભ્ય (MLA) હરિ ઓમ યાદવ અને બેહટ બેઠકના કોંગ્રેસના ધારાસભ્ય નરેશ સૈની બુધવારે ભારતીય જનતા પાર્ટીમાં જોડાયા છે. યાદવ અને સૈની સિવાય બીજેપીના પ્રદેશ અધ્યક્ષ સ્વતંત્ર દેવ સિંહે એતમાદપુરથી બીએસપીના પૂર્વ ધારાસભ્ય ધરમપાલ સિંહને પાર્ટીમાં સામેલ કર્યા છે. તેમણે કહ્યું કે આ નેતાઓના જોડાવાથી પાર્ટીના ચૂંટણી અભિયાનને મજબૂતી મળશે. આ પ્રસંગે નાયબ મુખ્યમંત્રી કેશવ પ્રસાદ મૌર્ય અને પાર્ટીના અન્ય વરિષ્ઠ નેતાઓ પણ હાજર હતા.
ફિરોઝાબાદના સપાના મજબૂત નેતાઓમાંથી એક હરિ ઓમ યાદવ ત્રણ વખત ધારાસભ્ય રહી ચૂક્યા છે. યાદવે સપા નેતા રામ ગોપાલ યાદવ સાથે મતભેદને કારણે પાર્ટી છોડવાનો નિર્ણય લીધો હોવાનું માનવામાં આવે છે. દરમિયાન, સહારનપુરના કોંગ્રેસના બે ધારાસભ્યો, ઇમરાન મસૂદ અને મસૂદ અખ્તરે સપામાં જોડાવાનો નિર્ણય કર્યો છે.
આ અગાઉ ભાજપના કેબિનેટ મંત્રી સ્વામી પ્રસાદ મૌર્યએ રાજીનામું આપ્યા બાદ વધુ ત્રણ ધારાસભ્યોએ પાર્ટી છોડી દીધી છે. સ્વામી પ્રસાદના સમર્થનમાં ધારાસભ્યો બ્રિજેશ પ્રજાપતિ, ભગવતી પ્રસાદ સાગર અને રોશન લાલ વર્માએ પણ ભાજપ છોડી દીધું હતું.
કોંગ્રેસના બે ધારાસભ્યોએ કહ્યું, અમે સપામાં જઈ રહ્યા છીએ
મસૂદ અખ્તરે કહ્યું, ‘અમે કોંગ્રેસ પાસેથી માંગ કરી હતી કે સમાજવાદી પાર્ટી સાથે ગઠબંધન કરવામાં આવે પરંતુ તે થઈ શક્યું નહીં. અહીં ભાજપ અને સપા વચ્ચે સીધો મુકાબલો છે. એટલા માટે મેં અને ઈમરાન મસૂદે સમાજવાદી પાર્ટીમાં જવાનું નક્કી કર્યું છે. અમે આજે જોડાવા માટે અખિલેશ યાદવ પાસે સમય માંગ્યો છે.
સ્વામીએ એ પણ સ્પષ્ટ કર્યું, 14 જાન્યુઆરીએ SPમાં જોડાશે
બીજી તરફ મંગળવારે જ બીજેપી છોડી ચૂકેલા સ્વામી પ્રસાદ મૌર્યએ સ્પષ્ટ કર્યું છે કે તેઓ સપામાં જશે. તેમણે કહ્યું કે હું 14 જાન્યુઆરીએ સમાજવાદી પાર્ટીમાં જોડાઈ રહ્યો છું. ભાજપ દ્વારા તેમને મનાવવાના પ્રયાસો અંગે મૌર્યએ કહ્યું કે કોઈએ તેમનો સંપર્ક કર્યો નથી. મૌર્ય પછી, તેમની સાથે બીજેપી છોડવાની જાહેરાત કરનારા ઘણા વધુ ધારાસભ્યો પણ સપામાં જોડાઈ શકે છે.
