મંગળવારે સુરતમાં કોરોનાના કારણે બે મોત થયા પછી છેલ્લા 24 કલાકમાં નવા 10 શંકાસ્પદ કેસ નોંધાયા હતા. જ્યારે એક પોઝિટિવ કેસ નોંધાયો હતો. બુધવાર સવારના અપડેટ પ્રમાણે સેન્ટ્રલ ઝોન સોદાગરવાડ વિસ્તારનાં નિવાસી 70 વર્ષીય મહિલા ફાતેમાબીબી સરબતવાલાનો રિપોર્ટ પોઝિટિવ આવ્યો હતો. તેઓની કોઈ ટ્રાવેલ હિસ્ટ્રી નથી અને તેઓ 6 એપ્રિલના રોજ મિશન હોસ્પિટલમાં એડમિટ થયા હતાં. ઉપરાંત 10 નવા શંકાસ્પદ અને 8ના રિપોર્ટ નેગેટિવ આવ્યા હતાં. સુરતમાં અત્યાર સુધી કોરોનાને 21 કેસ પોઝિટિવ છે જ્યારે 211 નેગેટિવ આવ્યા છે. 7ના રિપોર્ટ પેન્ડિંગ છે અને 4ના મોત થયા છે. કુલ શંકાસ્પદ કેસનો આંકડો 239 પર પહોંચ્યો છે.
સુરતમાં વધુ જે 10 શંકાસ્પદ કેસ આવ્યા છે તેમાં 1 દિવસના નિલગીરીના લિંબાયતના નવજાતશીશુનો સમાવેશ થાય છે, જો કે, તેનો રિપોર્ટ નેગેટિવ આવી ગયો છે. પરવટ પાટિયાના 7 મહિનાના બાળકને નવી સિવિલ હોસ્પિટલમાં ખસેડવામાં આવ્યો છે. બેગમપુરાની 40 વર્ષીય મહિલાને પણ નવી સિવિલ હોસ્પિટલમાં ખસેડવામાં આવી છે તે પોઝિટિવ દર્દીના સંપર્કમાં હતી. મગોબના 78 વર્ષીય વૃદ્ધને મિશનમાં ખસેડવામાં આવ્યા છે. પૂણાના 55 વર્ષીય પુરૂષને પણ મિશનમાં ખસેડવામાં આવ્યા છે. ગોપીપુરાના 52 વર્ષીય પુરૂષને પણ મિશનમાં ખસેડવામાં આવ્યા છે. પાલનપુર પાટિયાના 67 વર્ષીય વૃદ્ધને પણ મિશનમાં ખસેડવામાં આવ્યા છે અને તેમની મુંબઇની ટ્રાવેલ હિસ્ટ્રી છે. વીઆઇપી રોડની આઠ વર્ષની બાળકીને મીશનમાં ખસેડવામાં આવી છે જો કે, તેનો રિપોર્ટ નેગેટિવ આવી ગયો છે. શંકાસ્પદ દર્દી તરીકે શેલ્બીમાં દાખલ થયેલા પીપલોદના 64 વર્ષીય પુરૂષનો રિપોર્ટ પણ નેગેટિવ આવ્યો છે. જ્યારે રામપુરાના 27 વર્ષીય યુવાનને નવી સિવિલ હોસ્પિટલમાં દાખલ કરવામાં આવ્યો છે અને તે પોઝિટિવ દર્દીના સંપર્કમાં હતો.
બીજી તરફ શહેરમાં કોરોના સામે લડી રહેલા તંત્ર દ્વારા હવે સ્થાનિક સંક્રમણ સામે વધુ ચુસ્ત બનવા માટે જે વિસ્તારમાંથી પોઝીટવ કેસ મળે છે. તે વિસ્તારમાં લોકોના રેન્ડમલી સેમ્પલ લઇને ચકાસણી ચાલુ કરી છે. જેથી જેનામાં કોઇ લક્ષણ ના દેખાતા હોય તે પણ કોરોના પોઝિટિવ હોય તો સમયસર પગલા ભરી શકાય. આ ગોઠવણ અંતર્ગત રાંદેરના સિદ્દીકી સ્કવેરની આસપાસના વિસ્તારમાંથી 95 સેમ્પલ લઇને અમદાવાદ ચેકઅપ માટે મોકલી અપાયા હતા. ઝાંપાબજાર-બેગમપુરા વિસ્તારમાંથી આ રીતે રેન્ડમલી સેમ્પલ લેવાયા હતાં.
