ઈરાનના દક્ષિણ-પૂર્વીય ક્ષેત્રમાં એક મોટા આતંકવાદી હુમલાની માહિતી બહાર આવી રહી છે. આ હુમલો ન્યાયતંત્રની ઇમારત પર થયો હતો. આ હુમલામાં ઓછામાં ઓછા આઠ લોકો માર્યા ગયા હતા જેમાં પાંચ નાગરિકો અને ત્રણ હુમલાખોરોનો સમાવેશ થાય છે. આ માહિતી ઈરાનના રાજ્ય મીડિયા દ્વારા આપવામાં આવી છે.
ન્યાયતંત્રના મિઝાન ઓનલાઈન પોર્ટલ અનુસાર, “અજાણ્યા બંદૂકધારીઓએ દક્ષિણ-પૂર્વીય સિસ્તાન-બલુચિસ્તાન પ્રાંતની રાજધાની ઝાહેદાનમાં ન્યાયતંત્ર કેન્દ્ર પર હુમલો કર્યો હતો. આ દરમિયાન આતંકવાદીઓએ કોર્ટ પર ગ્રેનેડ ફેંક્યો. આ આતંકવાદી હુમલામાં પાંચ લોકો માર્યા ગયા છે અને 13 લોકો ઘાયલ થયા છે.” રાજ્ય સમાચાર એજન્સી IRNA એ હુમલા દરમિયાન ત્રણ આતંકવાદીઓને માર્યા ગયા હોવાનો દાવો કર્યો છે.
ગલ્ફ ન્યૂઝે સિસ્તાન-બલુચિસ્તાનના ડેપ્યુટી પોલીસ કમાન્ડર અલીરેઝા દાલીરીને ટાંકીને કહ્યું કે હુમલાખોરો મુલાકાતીઓના વેશમાં કોર્ટ બિલ્ડિંગમાં પ્રવેશ્યા અને બિલ્ડિંગની અંદર ગ્રેનેડ ફેંક્યો. અહેવાલ મુજબ, “આ આતંકવાદી હુમલામાં પાંચ લોકો માર્યા ગયા છે અને 13 લોકો ઘાયલ થયા છે.” જોકે આ આંકડા પ્રાથમિક છે અને મૃત્યુઆંક વધી શકે છે. મૃતકોમાં એક શિશુ અને તેની માતાનો પણ સમાવેશ થાય છે. રાજ્ય સમાચાર એજન્સી IRNA એ ઇસ્લામિક રિવોલ્યુશનરી ગાર્ડ કોર્પ્સ (IRGC) ના પ્રાદેશિક કમાન્ડને ટાંકીને જણાવ્યું હતું કે હુમલા દરમિયાન ત્રણ હુમલાખોરો માર્યા ગયા હતા.
જૈશ અલ-અદલે હુમલાની જવાબદારી સ્વીકારી
ઈરાની મીડિયા અહેવાલો અનુસાર બલૂચ જેહાદી જૂથ જૈશ અલ-અદલે, જે ઈરાનમાં સક્રિય છે અને પાકિસ્તાનમાં સરહદ પાર સ્થિત છે તેણે હુમલાની જવાબદારી સ્વીકારી છે. જે શહેર પર હુમલો થયો હતો તે તેહરાનથી લગભગ 1,200 કિલોમીટર (745 માઇલ) દક્ષિણપૂર્વમાં સ્થિત છે. તે એક અસ્થિર પ્રદેશનો ભાગ છે જે લાંબા સમયથી આતંકવાદીઓ, ડ્રગ હેરફેર કરનારાઓ અને અલગતાવાદી જૂથોની પ્રવૃત્તિઓને કારણે અશાંતિનું કેન્દ્ર રહ્યું છે. આ પ્રાંત પાકિસ્તાન અને અફઘાનિસ્તાનની સરહદે છે. આ પ્રદેશમાં સૌથી ભયંકર ઘટનાઓમાંની એક ઓક્ટોબર 2023 માં બની હતી જેમાં 10 ઈરાની પોલીસ અધિકારીઓ માર્યા ગયા હતા જેને અધિકારીઓએ આતંકવાદી હુમલો તરીકે પણ વર્ણવ્યો હતો.
