Latest News

વિશ્વ પર્યાવરણ દિવસના અવસરે સુરતની મુલાકાત પૂર્ણ કર્યા બાદ વડાપ્રધાન નરેન્દ્ર મોદી સંઘપ્રદેશ દમણ પહોંચ્યા છે. તેમના આગમનને લઈને સમગ્ર દમણમાં ઉત્સાહ અને ઉજવણીનો માહોલ જોવા મળી રહ્યો છે. રસ્તાઓ પર લોકો મોટી સંખ્યામાં એકત્ર થયા છે અને વિવિધ સમાજના લોકો પરંપરાગત વેશભૂષા તથા સાંસ્કૃતિક ઝાંખીઓ સાથે વડાપ્રધાનનું સ્વાગત કરવા આતુર બન્યા છે. વડાપ્રધાન દમણમાં આશરે રૂ. 3000 કરોડના 53 વિકાસ પ્રોજેક્ટ્સનું લોકાર્પણ અને ખાતમુહૂર્ત કરશે. આ વિકાસકાર્યોમાં નમો ડોમેસ્ટિક એરપોર્ટ, નમો હોસ્પિટલ, આઇકોનિક બ્રિજ, અદ્યતન કન્વેન્શન સેન્ટર સહિત અનેક મહત્વપૂર્ણ યોજનાઓનો સમાવેશ થાય છે. આ પ્રોજેક્ટ્સ દમણના ઈન્ફ્રાસ્ટ્રક્ચર, આરોગ્ય, પ્રવાસન અને કનેક્ટિવિટીને નવી ઊંચાઈ આપશે તેવી અપેક્ષા છે.

પ્રાપ્ત માહિતી મુજબ, કુલ 53 પ્રોજેક્ટ્સમાંથી 38 પ્રોજેક્ટ્સનું લોકાર્પણ કરવામાં આવશે, જ્યારે 15 નવા વિકાસકાર્યોનો શિલાન્યાસ કરવામાં આવશે. આ તમામ યોજનાઓનો મુખ્ય ઉદ્દેશ્ય દમણમાં આધુનિક સુવિધાઓ ઉભી કરીને સર્વાંગી વિકાસને પ્રોત્સાહન આપવાનો છે. આ મુલાકાત દરમિયાન સૌથી વધુ ચર્ચામાં દમણનું નવું નમો ડોમેસ્ટિક એરપોર્ટ છે. એરપોર્ટ શરૂ થતાં દમણને દિલ્હી, મુંબઈ, અમદાવાદ અને સુરત જેવા મોટા શહેરો સાથે સીધી હવાઈ કનેક્ટિવિટી મળશે. અત્યાર સુધી દમણ મુખ્યત્વે દક્ષિણ ગુજરાત અને નજીકના વિસ્તારો સુધી મર્યાદિત હતું, પરંતુ હવે દેશના વિવિધ ભાગોમાંથી પ્રવાસીઓ સરળતાથી અહીં પહોંચી શકશે. નવી હવાઈ કનેક્ટિવિટીના કારણે સ્થાનિક ઉદ્યોગોને પણ મોટો ફાયદો થવાની શક્યતા છે. સાથે જ દમણમાં વિકસાવવામાં આવેલી નાઇટ માર્કેટ અને અન્ય પ્રવાસન સ્થળોએ મુલાકાતીઓની સંખ્યામાં વધારો થશે તેવી આશા વ્યક્ત કરવામાં આવી રહી છે.

દમણના વિકાસ સાથે વડાપ્રધાન લક્ષદ્વીપ માટે પણ મહત્વપૂર્ણ ભેટ આપશે. તેઓ આશરે રૂ. 885 કરોડના ચાર મહત્વના પ્રોજેક્ટ્સનો શિલાન્યાસ કરશે. આ યોજનાઓ હેઠળ કલ્પેની અને કદમત ટાપુઓ પર આધુનિક બંદર સુવિધાઓ વિકસાવવામાં આવશે. આ પ્રોજેક્ટ્સ અંતર્ગત બહુહેતુક જેટીઓનું નિર્માણ કરવામાં આવશે, જ્યાં 300 મીટર લાંબા ક્રૂઝ જહાજો સહિત મોટા પેસેન્જર જહાજો વર્ષભર લાંગરાવી શકશે. ઉપરાંત મુસાફરો અને માલસામાનના સરળ સંચાલન, માછીમારી પ્રવૃત્તિઓ, બળતણ વિતરણ, બરફ પુરવઠો અને બોટ રિપેરિંગ જેવી સુવિધાઓ પણ ઉપલબ્ધ કરાવવામાં આવશે. આ યોજનાઓથી દરિયાઈ કનેક્ટિવિટી મજબૂત બનશે, સ્થાનિક માછીમારોને રોજગારીમાં સહાય મળશે અને પ્રવાસન ઉદ્યોગને પણ નવી ગતિ મળશે. સાથે જ ટાપુઓના સામાજિક અને આર્થિક વિકાસમાં મહત્વપૂર્ણ યોગદાન મળશે.

દમણ પ્રદેશ ભાજપના અધ્યક્ષ મહેશ અગરિયાએ જણાવ્યું હતું કે વડાપ્રધાન નરેન્દ્ર મોદી અને સંઘપ્રદેશના પ્રશાસક પ્રફુલ પટેલના માર્ગદર્શન હેઠળ દમણમાં ઐતિહાસિક વિકાસ થઈ રહ્યો છે. છેલ્લા કેટલાક વર્ષોમાં દમણના ઈન્ફ્રાસ્ટ્રક્ચર, પ્રવાસન અને જાહેર સુવિધાઓમાં નોંધપાત્ર સુધારો જોવા મળ્યો છે. વડાપ્રધાનના કાર્યક્રમને લઈને ભાજપ અને સ્થાનિક તંત્ર દ્વારા વ્યાપક તૈયારીઓ કરવામાં આવી છે. જાહેર સભામાં દમણ ઉપરાંત ગુજરાતના નજીકના વિસ્તારોમાંથી પણ મોટી સંખ્યામાં લોકો હાજર રહે તેવી સંભાવના છે. અંદાજે એક લાખથી વધુ લોકો સભામાં ભાગ લે તેવી શક્યતા વ્યક્ત કરવામાં આવી રહી છે. કાર્યક્રમને સફળ બનાવવા માટે ભાજપના કાર્યકરો દ્વારા છેલ્લા ઘણા દિવસોથી સ્વચ્છતા અભિયાન ચલાવવામાં આવ્યું છે. ઉપરાંત ઘર-ઘર જઈ લોકોને સભામાં જોડાવા માટે આમંત્રણ પણ આપવામાં આવ્યું છે. દમણવાસીઓ માટે વડાપ્રધાનની આ મુલાકાત વિકાસના નવા અધ્યાયની શરૂઆત તરીકે જોવામાં આવી રહી છે. નમો એરપોર્ટ, નમો હોસ્પિટલ અને અન્ય મહત્વપૂર્ણ પ્રોજેક્ટ્સના કારણે દમણ આગામી વર્ષોમાં પ્રવાસન અને વિકાસના ક્ષેત્રે વધુ મજબૂત ઓળખ ઉભી કરશે તેવી આશા વ્યક્ત કરવામાં આવી રહી છે.