Latest News

રહસ્યમય ધડાકાથી તંત્ર એલર્ટ, OHE થાંભલો નમ્યો, ટ્રેક પાસે પાંચ ફૂટનો ખાડો સર્જાયો
: ટેકનિકલ ટીમની તાત્કાલિક કામગીરીથી ટ્રેન વ્યવહાર ઝડપથી સામાન્ય
પ્રતિનિધિ, ગોધરા તા. ૩૧ — સંતરોડ અને ચંચેલાવ રેલવે સ્ટેશન વચ્ચે મુખ્ય રેલવે ટ્રેક નજીક અચાનક થયેલા ભારે ધડાકાથી રેલવે તંત્ર એલર્ટ મોડ પર આવી ગયું હતું. પ્રાથમિક માહિતી મુજબ ટ્રેક નજીક વીજળીના પોલ નંબર 148525 પાસે જોરદાર અવાજ સંભળાતા આસપાસના લોકો એકત્રિત થઈ ગયા હતા અને તંત્રને જાણ કરવામાં આવી હતી.

આ ધડાકો એટલો જોરદાર હતો કે ઓવરહેડ ઇલેક્ટ્રિક (OHE)નો થાંભલો નમી ગયો હતો અને ટ્રેક નજીક જમીનમાં અંદાજે પાંચ ફૂટ જેટલો ખાડો પડી ગયો હતો. પ્રાથમિક અનુમાન મુજબ કોઈ પક્ષી વીજ તાર સાથે અથડાતા શોર્ટ-સર્કિટ જેવી અસામાન્ય ઘટના બની હોઈ શકે તેવી શક્યતા વ્યક્ત કરવામાં આવી રહી છે. જોકે ઘટનાનું ચોક્કસ કારણ અંગે હજુ સત્તાવાર સ્પષ્ટતા કરવામાં આવી નથી.

ઘટનાને પગલે શરૂઆતમાં રેલવે વ્યવહાર પર આંશિક અસર પડી હતી, પરંતુ રેલવે વિભાગની ટેકનિકલ ટીમોએ તાત્કાલિક કાર્યવાહી કરીને નમેલા થાંભલાને સાઈડમાં ખસેડી ટ્રેક પરથી અવરોધ દૂર કર્યો હતો. ત્યારબાદ થોડા જ સમયમાં ટ્રેનોની અવરજવર ફરીથી રાબેતા મુજબ શરૂ કરવામાં આવી હતી.
બનાવની જાણ થતાં જ રેલવે સુરક્ષા દળ તથા ઉચ્ચ અધિકારીઓની ટીમો સ્થળ પર પહોંચી તપાસ હાથ ધરી હતી. સદનસીબે આ ઘટનામાં કોઈ જાનહાનિ નોંધાઈ નથી.

રિપોર્ટર: આશિષ બારીયા