Latest News

​પોલીસે પંચનામા માટે મંજૂરી માગી પણ પાલિકાએ હજુ સુધી ‘હા’ ન કહેતા સવાલો સર્જાયા

વડોદરા શહેરમાં આવેલા અતાપી વન્ડરલેન્ડને લગતી મહત્વની ફાઇલ ગુમ થવાના ચકચારી મામલામાં હવે પોલીસ તપાસમાં નવો વળાંક આવ્યો છે. આ ફાઇલ ગુમ થવા અંગે કેમ્પ ઓફિસ ખાતે પોલીસ દ્વારા પંચનામું કરવાની કાર્યવાહી હાથ ધરવા માટે વડોદરા મહાનગરપાલિકા પાસે સત્તાવાર રીતે મંજૂરી માગવામાં આવી હતી, પરંતુ પોલીસ સૂત્રોના દાવા મુજબ પાલિકા દ્વારા હજી સુધી આ મંજૂરી આપવામાં આવી નથી.
પ્રાપ્ત વિગતો અનુસાર, અતાપી વન્ડરલેન્ડને લગતા કેટલાક દસ્તાવેજોની ફાઇલ ગુમ થઈ હોવાની ફરિયાદના આધારે પોલીસ દ્વારા તપાસ શરૂ કરવામાં આવી હતી. આ તપાસના ભાગરૂપે, ગુમ થયેલી ફાઇલ કયા સંજોગોમાં અને કયા સ્થળેથી ગાયબ થઈ તે જાણવા માટે કેમ્પ ઓફિસના જે તે વિભાગમાં પંચનામાની કાયદેસરની કાર્યવાહી કરવી અનિવાર્ય છે.
પોલીસ દ્વારા આ કાયદાકીય પ્રક્રિયા પૂર્ણ કરવા માટે પાલિકા કમિશનરને પત્ર લખીને મંજૂરી માગી હતી, જેથી સરકારી કચેરીમાં પંચનામું કરી શકાય. જોકે, પોલીસે દાવો કર્યો છે કે, આ મામલે પાલિકા તરફથી હજી સુધી કોઈ સકારાત્મક પ્રતિસાદ કે મંજૂરી મળી નથી. જેના કારણે પોલીસની આગળની તપાસ અટકી પડી છે.
આ સંજોગોમાં સવાલ ઊભો થયો છે કે, શું પાલિકા અને પોલીસ તંત્ર વચ્ચે સંકલનનો અભાવ છે? અથવા આ વિવાદાસ્પદ ફાઇલ ગુમ થવાના મામલે પોલીસને તપાસમાં આગળ વધતા રોકવામાં આવી રહી છે?
ગુમ થયેલી ફાઇલ માત્ર વહીવટી પ્રક્રિયાનો ભાગ નથી, પરંતુ તેમાં વન્ડરલેન્ડને લગતા નાણાકીય અને પરવાનગી સંબંધિત મહત્વના દસ્તાવેજો હોવાની શક્યતા છે. જો આ ફાઇલ જાણી જોઈને ગુમ કરવામાં આવી હોય તો તેની પાછળ કોઈ મોટો ભ્રષ્ટાચાર કે ગેરરીતિ છુપાયેલી હોઈ શકે છે.
પાલિકાની મંજૂરી ન મળવાને કારણે હાલમાં પોલીસ કેમ્પ ઓફિસમાં પ્રવેશ કરીને પંચનામું કરી શકતી નથી. પરિણામે, ફાઇલ ગુમ થવા પાછળનું અસલી કારણ અને જવાબદાર વ્યક્તિઓ કોણ છે, તે જાણવાની પ્રક્રિયા અટકી ગઈ છે.
શહેરના એક મોટા પ્રોજેક્ટ સાથે સંકળાયેલી મહત્વની ફાઇલ ગુમ થવાનો મામલો પોલીસ તપાસ હેઠળ હોવા છતાં પાલિકા દ્વારા મંજૂરી આપવામાં વિલંબ થવાથી અનેક તર્ક-વિતર્ક સર્જાયા છે.