નવી દિલ્હી: ઈઝરાયેલ અને હમાસ વચ્ચે સંઘર્ષ (Israel-Hamas War) શરૂ થયાને હવે 15 દિવસ થઈ ગયા છે. બંને તરફથી ચાલી રહેલા હુમલામાં અત્યાર સુધીમાં 5,537થી વધુ લોકોએ જીવ (Death) ગુમાવ્યા છે. ઈઝરાયેલમાં હમાસના હુમલામાં મૃતકોની સંખ્યા 1400થી વધુ છે. ઇઝરાયેલમાં યુએસ (US) એમ્બેસીએ કહ્યું કે તેને માહિતી મળી છે કે ગાઝા-ઇજિપ્ત સરહદ (Rafah Border) વિદેશીઓ માટે ખોલવામાં આવી છે. જો કે ગાઝા છોડવા માટે તે કેટલો સમય ખુલ્લું રહેશે તે જાણી શકાયું નથી. દૂતાવાસે અમેરિકન નાગરિકોને સલાહ આપી છે કે તેઓ સરહદ તરફ જતા પહેલા અથવા તેને પાર કરવાનો પ્રયાસ કરતા પહેલા સાવચેતી રાખે કારણ કે પરિસ્થિતિ હજુ પણ અનિશ્ચિત છે.
ગાઝાથી ઈજીપ્ત જવા માટે રફાહ બોર્ડર ખોલી દેવામાં આવ્યું છે. મળતી માહિતી મુજબ આ નિર્ણય માનવીય મદદ માટે લેવામાં આવ્યો છે. માનવતાવાદી સહાયથી ભરેલી ટ્રકો શનિવારે ગાઝા પટ્ટીના રફાહ ક્રોસિંગમાં પ્રવેશવા લાગી હતી. દવા અને ખાદ્યપદાર્થોની 20 ટ્રકો ગાઝા પહોંચી ગઈ છે. અમેરિકન અને ઇઝરાયેલના અધિકારીઓએ જણાવ્યું હતું કે અમેરિકી રાષ્ટ્રપતિ બિડેન અને તેમના ટોચના સહયોગીઓએ ઇઝરાયેલી નેતાઓને હિઝબુલ્લાહ સામે કોઇ મોટા હુમલા ન કરવા વિનંતી કરી છે. જો ઇઝરાયેલ હુમલો કરશે તો યુદ્ધ વધશે.
ઈઝરાયલના વડાપ્રધાન બેન્જામિન નેતન્યાહુએ ગાઝામાં વિજય સુધી લડવાની પ્રતિજ્ઞા લીધી છે. તેણે એ પણ સંકેત આપ્યો છે કે તેમની સેનાની એન્ક્લેવ પર ગ્રાઉન્ડ એટેક રોકવાની કોઈ યોજના નથી. દરમિયાન, ગાઝામાં પરિસ્થિતિ વણસી રહી છે કારણ કે ઇઝરાયેલી હુમલાઓ પેલેસ્ટિનિયન એન્ક્લેવને ફટકારે છે અને સહાય એજન્સીઓએ ચેતવણી આપી છે કે હોસ્પિટલોમાં પુરવઠો લગભગ સમાપ્ત થઈ ગયો છે.
હમાસને ખતમ કરવાની પ્રતિજ્ઞા લીધા બાદ ઈઝરાયેલે ગાઝા પટ્ટી પર હવાઈ હુમલા શરૂ કર્યા છે. સંયુક્ત રાષ્ટ્રનું માનવું છે કે ગાઝામાં 140,000 અથવા એક તૃતીયાંશ ઘરોને નુકસાન થયું છે. તે જ સમયે, લગભગ 13,000 ઘરો સંપૂર્ણપણે નાશ પામ્યા છે.
