અમેરિકા-ઈઝરાયલ-ઈરાન યુદ્ધને નવ દિવસ થયા છે. દરમિયાન ઈઝરાયલે ઈરાનમાં તેલ સંગ્રહ અને રિફાઈનરી સુવિધાઓ પર હવાઈ હુમલો કર્યો છે. ઈઝરાયલી મીડિયા અનુસાર 30 ઈરાની ઈંધણ ટાંકી અને ત્રણ તેલ ડેપોને નિશાન બનાવવામાં આવ્યા છે. તેના જવાબમાં ઈરાને ઈઝરાયલ, કુવૈત, સાઉદી અરેબિયા, બહેરીન અને સંયુક્ત આરબ અમીરાત (UAE) સહિત પાંચ દેશો પર હુમલો કરીને બદલો લીધો છે. ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC) એ જણાવ્યું છે કે તે અમેરિકા અને ઈઝરાયલ સામે છ મહિનાનું યુદ્ધ લડવા સક્ષમ છે.
IRGC પ્રવક્તા અલી મોહમ્મદ નૈનીએ જણાવ્યું હતું કે ઈરાની સેના અને રિવોલ્યુશનરી ગાર્ડ કોર્પ્સ બંને લાંબા સંઘર્ષ માટે સક્ષમ છે. તેમણે એવો પણ દાવો કર્યો હતો કે મધ્ય પૂર્વમાં યુએસ અને ઇઝરાયલી લશ્કરી થાણાઓ અને સુવિધાઓ સાથે સંબંધિત 200 થી વધુ લક્ષ્યોને નિશાન બનાવવામાં આવ્યા છે.
કતારના અમીર અને ટ્રમ્પે ફોન પર વાત કરી
કતારના અમીર શેખ તમિમ બિન હમાદ અલ થાનીએ ટ્રમ્પ સાથે વાત કરી. તેમણે કહ્યું કે વધતા તણાવના વિશ્વ માટે ખતરનાક પરિણામો આવી શકે છે. દરમિયાન ચીનના વિદેશ મંત્રી વાંગ યીએ તાત્કાલિક યુદ્ધવિરામ અને વાતચીત ફરી શરૂ કરવાની હાકલ કરી.
ઈરાની નેતાએ કહ્યું- ટ્રમ્પ અમેરિકાને નુકસાન પહોંચાડી રહ્યા છે
ઈરાની સંસદના સ્પીકર મોહમ્મદ બાઘર ગાલિબાફે યુએસ પ્રમુખ ડોનાલ્ડ ટ્રમ્પ પર યુએસ હિતોને નુકસાન પહોંચાડવાનો આરોપ લગાવ્યો. તેમણે ચેતવણી આપી હતી કે જો યુદ્ધ ચાલુ રહેશે તો વૈશ્વિક તેલ પુરવઠાને ગંભીર અસર થઈ શકે છે. ગાલિબાફે સોશિયલ મીડિયા પ્લેટફોર્મ X પર લખ્યું હતું કે જો યુદ્ધ ચાલુ રહેશે તો તેલ વેચવાનો કે તેનું ઉત્પાદન કરવાની ક્ષમતાનો કોઈ રસ્તો રહેશે નહીં. તેમણે કહ્યું હતું કે આ સંઘર્ષ માત્ર યુએસ હિતોને જ નહીં પરંતુ સમગ્ર પ્રદેશ અને વિશ્વના દેશોના હિતોને પણ નુકસાન પહોંચાડી રહ્યો છે. ગાલિબાફે એવો પણ આરોપ લગાવ્યો હતો કે ટ્રમ્પ ઇઝરાયલી વડા પ્રધાન બેન્જામિન નેતન્યાહૂની નીતિઓને કારણે આવા પગલાં લઈ રહ્યા છે જે અમેરિકા અને પ્રદેશ બંનેને નુકસાન પહોંચાડી રહ્યા છે.
