નવી દિલ્હી: ઇસરો (ISRO) અવકાશમાં સતત સફળતા મેળવી રહ્યું છે. ત્યારે શનિવારે અવકાશમાંથી વધુ એક સારા સમાચાર આવ્યા છે, જેને ઈસરોએ તેના X હેન્ડલ સાથે શેર કર્યા છે. સારા સમાચાર આદિત્ય-L1 (Aditya L-1) વિશે છે. ઈન્ડિયન સ્પેસ એજન્સી (ISRO) એ તેના સૂર્ય મિશન આદિત્ય-L1ને લઈને એક મોટું અપડેટ આપતાં કહ્યું કે, આદિત્ય-L1એ અત્યાર સુધીમાં 9.2 લાખ કિમીનું અંતર કાપ્યું છે અને સન પોઈન્ટ એલ1ની શોધ કરી રહ્યું છે. આદિત્ય-L1 એ પૃથ્વીના પ્રભાવ ક્ષેત્રને સફળતાપૂર્વક પાર કરીને આ અંતર કાપ્યું છે. આ સતત બીજી વખત છે, જ્યારે ઈસરોએ પૃથ્વીના પ્રભાવ ક્ષેત્રની બહાર અવકાશયાન મોકલવામાં સફળતા મેળવી છે. પ્રથમ વખત, માર્સ ઓર્બિટર મિશન (Mangalyaan)ને પૃથ્વીના પ્રભાવના ક્ષેત્રની બહાર સફળતા પુર્વક મોકલવામાં આવ્યું હતું.
લારેન્જ પોઈન્ટ વન સુધી આગળ વધ્યું છે આદિત્ય એલ-1
19 સપ્ટેમ્બરના રોજ જાહેર થયેલા અપડેટ મુજબ, આદિત્ય-L1 સૂર્ય મિશન પૃથ્વી અને સૂર્યની વચ્ચે હાજર લેરેન્જ પોઈન્ટ 1 તરફ આગળ વધ્યું હતું. તેનો અર્થ એ કે તેનું ટ્રાન્સ લેગ્રેંગિયન પોઈન્ટ 1 ઈન્સર્શન (TLI1) થઈ ગયું છે. હવે આદિત્યને માત્ર 110 દિવસ માટે અંતરિક્ષમાં મુસાફરી કરવાની છે. આ પછી જ તે L1 પોઈન્ટ પર પહોંચશે. મોરેશિયસ, બેંગલુરુમાં ITRAC, શ્રીહરિકોટામાં SDSC-SHAR અને પોર્ટ બ્લેરમાં ISRO સેન્ટરથી તેનું નિરીક્ષણ કરવામાં આવ્યું હતું. આ પહેલા આદિત્યએ તેની તરફથી કેટલાક ડેટા મોકલ્યા હતા. જે તેના STEPS યંત્ર દ્વારા એકત્રિત કરવામાં આવ્યા હતાં. આ સાધને 50 હજાર કિલોમીટરના અંતરેથી સુપરથર્મલ-એનર્જેટિક આયનો અને ઇલેક્ટ્રોનનો અભ્યાસ શરૂ કરી દીધો છે. આનાથી વૈજ્ઞાનિકોને એ સમજવામાં મદદ મળશે કે આ કણો પૃથ્વી પર શું અસર કરે છે. તેનો અભ્યાસ કરી શકાશે.
ફેબ્રુઆરીમાં મળશે સૂર્યનો પહેલો ફોટો
આદિત્ય-એલ1 પરથી સૂર્યનો પહેલો ફોટો ફેબ્રુઆરી અથવા માર્ચમાં ઉપલબ્ધ થશે. VELC ની રચના ભારતીય એસ્ટ્રોફિઝિક્સ સંસ્થા દ્વારા કરવામાં આવી છે. ઈસરોના સૂર્ય મિશનમાં સ્થાપિત VELC સૂર્યના HD ફોટા લેશે. L1 સુધીની મુસાફરી પૂર્ણ કર્યા પછી, આદિત્યના તમામ પેલોડ્સ ચાલુ થઈ જશે. એટલે કે તેમાં સ્થાપિત તમામ સાધનો સક્રિય થઈ જશે. અને તે સૂર્યનો અભ્યાસ શરૂ કરશે. PAPA એટલે પ્લાઝ્મા એનાલાઈઝર પેકેજ ફોર આદિત્ય… તે સૂર્યના ગરમ પવનોમાં હાજર ઇલેક્ટ્રોન અને ભારે આયનો અને તેની દિશાઓનો અભ્યાસ કરશે. આ પવનોમાં કેટલી ગરમી છે તે જાણવા મળશે. તે ચાર્જ થયેલા કણો એટલે કે આયનોનું વજન પણ નક્કી કરશે. SUIT એટલે સોલર અલ્ટ્રાવાયોલેટ ઇમેજિંગ ટેલિસ્કોપ… તે અલ્ટ્રાવાયોલેટ ટેલિસ્કોપ છે. તે સૂર્યની અલ્ટ્રાવાયોલેટ તરંગલંબાઇના ફોટાઓ લેશે. તે સૂર્યના ફોટોસ્ફિયર અને ક્રોમોસ્ફિયરની તસવીરો પણ લેશે.
