નવી દિલ્હી: જો તમારી પાસે 25 ઓક્ટોબરથી દિલ્હીમાં માન્ય પોલ્યુશન અંડર કંટ્રોલ સર્ટિફિકેટ (PUC) નથી, તો તમને પંપમાંથી ઇંધણ નહીં મળે. દિલ્હી સરકારે આગામી શિયાળાની ઋતુમાં વાહનોના પ્રદૂષણને રોકવા માટે આ નિર્ણય લીધો છે. દિલ્હી સરકારના પર્યાવરણ મંત્રી ગોપાલ રાયે આ અંગેની માહિતી આપી હતી. પર્યાવરણ મંત્રી ગોપાલ રાયે કહ્યું કે શિયાળામાં વધતા પ્રદૂષણને જોતા દિલ્હી સરકારે 30 વિભાગો સાથે વિન્ટર એક્શન પ્લાન તૈયાર કર્યો છે. તે ગઈ કાલે સીએમ કેજરીવાલે સામે મુકવામાં આવ્યો હતો.
દિલ્હીમાં 15 મુદ્દાની યોજના તૈયાર
પર્યાવરણ મંત્રી ગોપાલ રાયે જણાવ્યું હતું કે દિલ્હીની જનતા સાથે દિલ્હી સરકાર દ્વારા કરવામાં આવેલા પ્રયાસોને કારણે પીએમ 10માં 18 ટકાથી વધુનો ઘટાડો થયો છે. દિલ્હીમાં 15 મુદ્દાની યોજના તૈયાર કરવામાં આવી છે, જેનો કડક અમલ કરવામાં આવશે અને તેના માટે તમામ વિભાગોને એલર્ટ કરી દેવામાં આવ્યા છે. CAQM દ્વારા સુધારેલ GRAP આજથી દિલ્હીમાં લાગુ કરવામાં આવી રહ્યું છે. આગાહીના આધારે આ વખતે ત્રણ દિવસ અગાઉથી કાર્યવાહી કરવાનું નક્કી કરવામાં આવ્યું છે, જેથી તમામ વિભાગો એલર્ટ પર રહેશે.
ગ્રીન દિલ્હી એપ દ્વારા જનભાગીદારી વધારાશે
ગોપાલ રાયે કહ્યું કે દિલ્હીમાં GRAP અને 15 પોઈન્ટ એક્શન પ્લાનના યોગ્ય અમલીકરણ માટે સોમવારથી દિલ્હી સચિવાલયમાં 24×7 વોર રૂમ કામ કરશે. એનસીઆરના વિસ્તારોમાં GRAPના અમલીકરણમાં કોઈ ગંભીરતા નથી. ગ્રીન દિલ્હી એપ દ્વારા અમે જનભાગીદારી વધારીશું. તેમણે કહ્યું કે, 15 પોઈન્ટ એક્શન પ્લાનમાંથી પહેલા વોર રૂમ 3 ઓક્ટોબરથી શરૂ થશે. 6થી ધૂળ વિરોધી અભિયાન શરૂ થશે. આ હેઠળ, 500 ચોરસ મીટરથી વધુ બાંધકામ સાઇટ્સ માટે વેબ પોર્ટલ પર નોંધણી કરાવવી ફરજિયાત છે. ઉપરાંત, પાંચ હજાર ચોરસ મીટરથી વધુની સાઇટ્સ પર સ્મોગ ગન લગાવવી જરૂરી છે. ખાનગી એજન્સીઓએ આ માટે તૈયારી કરવી જોઈએ. બાયો ડીકમ્પોઝરનો છંટકાવ 10 ઓક્ટોબરથી શરૂ થશે. આ વખતે પાંચ હજાર એકરમાં છંટકાવ કરવામાં આવશે. ગયા વર્ષે નરેલા બવાના, મુંડકામાંથી સ્ટબલ સળગાવવાની ઘટના બની હતી, ખેડૂતોને ડિકમ્પોઝરનો ઉપયોગ કરવા વિનંતી છે.
પ્રદૂષણ રોકવા નિર્ણય લેવાયો
પર્યાવરણ મંત્રીએ કહ્યું કે દિલ્હીમાં વાહનોના પ્રદૂષણને રોકવા માટે ઘણા પગલાં લેવામાં આવે છે, પરંતુ જો પ્રદૂષણનું સ્તર વધે તો પેટ્રોલ પંપ પર પીયુસી પ્રમાણપત્ર વિના પેટ્રોલ ન આપવું જોઈએ. દિલ્હી સરકાર આ માટે તૈયારી કરી રહી છે. માર્ચમાં અમે આ અંગે સૂચનો માંગ્યા હતા. 2 મેના રોજ સૂચનો આવ્યા હતા. 29 સપ્ટેમ્બરે વાહનવ્યવહાર, પર્યાવરણ, પોલીસ વગેરે વિભાગો સાથે બેઠક કરીને તૈયારીઓ શરૂ કરી દેવામાં આવી છે. 25 ઓક્ટોબરથી દિલ્હીના પેટ્રોલ પંપ પર PUC પ્રમાણપત્ર વિના પેટ્રોલ નહીં મળે. તેમણે કહ્યું કે દિલ્હીમાં પ્રદૂષણની સમસ્યા એર શેડની સમસ્યા છે, તેથી અપીલ છે કે એનસીઆરના રાજ્યોએ પણ તેમનો વિન્ટર એક્શન પ્લાન તૈયાર કરવો જોઈએ. યુપીની રાજધાની લખનૌ, રાજસ્થાનનું જયપુર અને હરિયાણાનું ચંદીગઢ છે, અધિકારીઓ બધા ત્યાં બેઠા છે, તેથી તેમને તેની ગંભીરતાનો ખ્યાલ નથી.
હાલમાં ઓડ-ઈવન માટે કોઈ પ્લાન નથી
તેઓએ કહ્યું કે અત્યારે ઓડ-ઈવન માટે કોઈ પ્લાન નથી. અત્યારે અમે GRAP પર ધ્યાન કેન્દ્રિત કરીશું. હવે AQI ના આધારે GRAP લાગુ થશે. જો AQI 200-300 ની વચ્ચે રહે છે, તો GRAP મુજબ, બાંધકામમાંથી ધૂળનું કડક પાલન કરવું પડશે, કચરાનું સંચાલન કરવું પડશે, જનરેટર સેટ બંધ કરવાનો આદેશ હશે. તેમણે કહ્યું કે જો AQI 300-400 છે, તો તંદૂર પર પ્રતિબંધ મૂકવો પડશે, ડીઝલ સેટ બંધ કરવા પડશે, પાર્કિંગ ફી વધારવી પડશે, મેટ્રો ટ્રિપ્સ વધારવાના આદેશ આપવામાં આવશે. 400-500 AQI સાથે, બહારથી આવતા વાહનો પર પ્રતિબંધ રહેશે, દિલ્હીના મોટા વાહનો બંધ રહેશે. જો તે 450 થી વધુ હશે તો વધુ કડક પગલાં લેવામાં આવશે. આમાં કોઈ ઓડ-ઈવન નથી, જરૂર પડશે તો સરકાર નક્કી કરશે.
