એર ઇન્ડિયા વિમાન દુર્ઘટનાના પ્રારંભિક તપાસ અહેવાલ પછી અન્ય એરલાઇન્સ કંપનીઓ પણ સતર્ક થઈ ગઈ છે. એતિહાદ સહિત વિવિધ એરલાઇન્સે તેમના પાઇલટ્સને ખાસ આદેશો આપ્યા છે. પાયલટ્સને ફ્યુઅલ સ્વીચ પ્રત્યે ખૂબ કાળજી રાખવાનું કહેવામાં આવ્યું છે.
એતિહાદે 12 જુલાઈના રોજ એક બુલેટિન બહાર પાડ્યું હતું, જે દિવસે એર ઇન્ડિયા વિમાન દુર્ઘટનાનો તપાસ અહેવાલ આવ્યો હતો. જેમાં પાયલટ્સને ફ્યુઅલ કંટ્રોલ સ્વીચ અથવા તેમની આસપાસ કોઈપણ અન્ય સ્વીચ/કંટ્રોલ ચલાવતી વખતે સાવચેત રહેવાનું કહેવામાં આવ્યું હતું.
સંયુક્ત આરબ અમીરાત (UAE) ની રાષ્ટ્રીય એરલાઇન એતિહાદ એરવેઝે તેના બોઇંગ 787 વિમાનના પાઇલટ્સને ઇંધણ સ્વીચો પ્રત્યે સાવચેત રહેવા કહ્યું છે. આ માટે પાયલટ્સને ખાસ માર્ગદર્શિકા આપવામાં આવી છે. એરલાઇન ઇંધણ નિયંત્રણ સ્વીચો કેવી રીતે કાર્ય કરે છે તેની પણ તપાસ કરી રહી છે. 12 જૂને ભારતના અમદાવાદમાં થયેલા વિમાન દુર્ઘટનાના પ્રારંભિક તપાસ અહેવાલ બહાર આવ્યા બાદ આ સાવચેતીભર્યું પગલું લેવામાં આવ્યું છે. રિપોર્ટમાં દાવો કરવામાં આવ્યો છે કે ટેકઓફ પછી તરત જ વિમાનના બંને ઇંધણ સ્વીચો બંધ કરી દેવામાં આવ્યા હતા.
એતિહાદ ઉપરાંત દક્ષિણ કોરિયાની સરકાર પણ આવા જ પગલાં લેવાની તૈયારી કરી રહી છે. દક્ષિણ કોરિયા બોઇંગ વિમાન ચલાવતી તેની એરલાઇન્સને ફ્યુઅલ કંટ્રોલ સ્વીચ તપાસવાનો આદેશ આપવાની તૈયારી કરી રહ્યું છે. એતિહાદ અને દક્ષિણ કોરિયાના તેમના પાઇલટ્સને આદેશ અને ફ્યુઅલ સ્વીચની તપાસ વચ્ચે, યુએસ ફેડરલ એવિએશન એડમિનિસ્ટ્રેશન (FAA) અને બોઇંગે કહ્યું છે કે 787 સહિત તેના વિમાનના ફ્યુઅલ કંટ્રોલ સ્વીચો અસુરક્ષિત નથી.
નોંધનીય છે કે અમદાવાદમાં થયેલા વિમાન દુર્ઘટનાના તપાસ અહેવાલમાં, ફ્યુઅલ સ્વીચમાં ખામીને કારણ તરીકે દર્શાવવામાં આવી છે. રિપોર્ટ અનુસાર, ફ્યુઅલ સ્વીચને થોડીક સેકન્ડમાં રનથી કટઓફ મોડમાં મૂકી દેવામાં આવી હતી.
