મહારાષ્ટ્રના ભૂતપૂર્વ મુખ્ય પ્રધાન અને શિવસેના (UBT) પ્રમુખ ઉદ્ધવ ઠાકરે સોમવારે ચૂંટણી પ્રચાર માટે યવતમાલના વાણી એરપોર્ટ પર પહોંચ્યા હતા. અહીં હેલિકોપ્ટરથી ઉતરતાની સાથે જ ચૂંટણી પંચના અધિકારીઓ તેમની બેગ તપાસવા આવ્યા હતા જેના કારણે ઉદ્ધવ ગુસ્સે થઈ ગયા હતા અને અધિકારીઓને કહ્યું હતું કે મોદીનું બેગ પણ આ રીતે જ ચેક કરજો.
ઉદ્ધવે બેગ ચેક કરતા અધિકારીઓનો વીડિયો બનાવ્યો અને તેને સોશિયલ મીડિયા પર શેર કર્યો છે. વીડિયોમાં ઉદ્ધવ અધિકારીઓને મોદી-શાહની બેગ ચેક કરવાની માંગ કરતા જોવા મળ્યા હતા. તેમણે કહ્યું કે મારી બેગ તપાસો. જો તમે ઇચ્છો તો તમે મારુ યુરિન પોટ પણ ચેક કરી શકો છો પરંતુ હવે મને તમે લોકો મોદીની બેગ ચેક કરતા હોવાનો વીડિયો જોઈએ છે. ત્યાં તમારી પૂંછડી ઝુકાવશો નહીં. ખોલો અને ચેક કરો, હું આ વિડિયો બહાર પાડી રહ્યો છું. આ પછી હું તમને લોકો ખોલીશ.
ઉદ્ધવે ચૂંટણી પંચના અધિકારીઓને પૂછ્યું કે અત્યાર સુધી તમે કયા લોકોની બેગ તપાસી છે? મારી પહેલા કયા નેતાઓની બેગ તપાસવામાં આવી? અધિકારી કહ્યું કે મેં આ પહેલા ક્યારેય કોઈની સાથે આવું કર્યું નથી, મને માત્ર 4 મહિના થયા છે.
ઉદ્ધવ કહ્યું કે તમે 4 મહિનામાં એક પણ બેગ તપાસી નથી. હું જ તમને પ્રથમ ગ્રાહક મળ્યો? ઓફિસરે કહ્યું કે ના સર… એવું કંઈ નથી. ઉદ્ધવે કહ્યું કે ના, તમે મારી બેગ તપાસો, હું તમને રોકીશ નહીં. જ્યારે તમે મારી બેગ તપાસી રહ્યા હો, ત્યારે મને કહો કે તમે હજુ સુધી એકનાથ શિંદેની બેગ તપાસી છે? શું તમે દેવેન્દ્ર ફડણવીસ, અજિત પવાર, મોદી, અમિત શાહની બેગ તપાસી છે? તેના જવબામાં અધિકારીએ કહ્યું કે હજી તક નથી મળી. ઉદ્ધવે કહ્યું કે જ્યારે મોદી આવે ત્યારે કૃપા કરીને મને તેઓની બેગ તપાસતો વીડિયો મોકલજો. ત્યાં તમારી પૂંછડી વાળશો નહીં.
AAP સાંસદે બેગ ચેક કર્યા બાદ કહ્યું- જનતા ચોક્કસ બદલો લેશે
AAP સાંસદ સંજય સિંહે કહ્યું કે બાળાસાહેબ ઠાકરેની પાર્ટી સાથે દુર્વ્યવહાર કરવાની મહારાષ્ટ્રમાં કોઈની હિંમત નહોતી, આજે પાર્ટીના નેતા ઉદ્ધવ ઠાકરે સાથે જે રીતે ગેરવર્તણૂક કરવામાં આવી છે, મહારાષ્ટ્રના લોકો તેમાં પાઠ ભણાવશે. સંજય સિંહે કહ્યું કે શું ઉદ્ધવ ઠાકરેને પ્રચાર કરવાની મંજૂરી નથી? શું તેઓ તેમના ઉમેદવારો માટે પ્રચાર ન કરી શકે? શું ક્યારેય અમિત શાહના હેલિકોપ્ટરની તપાસ કરવામાં આવી હતી? શું ક્યારેય નરેન્દ્ર મોદીના હેલિકોપ્ટરની તપાસ કરવામાં આવી હતી? તમે વિરોધને દબાવવા માંગો છો.
