નવી દિલ્હી: (New Delhi) ધરપકડ બાદ દિલ્હી હાઈકોર્ટે અરવિંદ કેજરીવાલને (Arwind Kejriwal) મુખ્યમંત્રી (CM) પદેથી હટાવવાની માંગ કરતી અરજીને ફગાવી દીધી હતી. હાઈકોર્ટે કહ્યું કે જો કોઈ સંકટની સ્થિતિ હોય તો રાષ્ટ્રપતિ અથવા એલજી નિર્ણય લેશે, કોર્ટ તેમાં દખલ નહીં કરે.
અરવિંદ કેજરીવાલને મુખ્યમંત્રી પદેથી હટાવવા માટે હાઈકોર્ટમાં દાખલ કરાયેલી બીજી અરજી પર કોર્ટે આદેશ આપવાનો ઈન્કાર કરી દીધો હતો. કોર્ટે આ મામલામાં કહ્યું કે કોર્ટ તમામ કામ ન કરી શકે. તમે ઇચ્છો ત્યાં જાઓ, અમે ઓર્ડર આપીશું નહીં. કાર્યવાહક ચીફ જસ્ટિસ મનમોહનની અધ્યક્ષતાવાળી ખંડપીઠે કહ્યું કે હાઈકોર્ટ તમામ કામ ન કરી શકે અને તે હાઈકોર્ટનું કામ નથી. કોર્ટે કહ્યું કે આ પહેલા પણ બે અરજી દાખલ કરવામાં આવી હતી. કોર્ટે કહ્યું કે તે લેફ્ટનન્ટ ગવર્નરે નક્કી કરવાનું છે અને જો તમારે ત્યાં જવું હોય તો જાઓ. અરજદાર તરફથી હાજર રહેલા એડવોકેટે કહ્યું કે જો કોર્ટ તેમને લેફ્ટનન્ટ ગવર્નરનો સંપર્ક કરવાની મંજૂરી આપે તો તે અરજી પાછી ખેંચી લેશે.
બીજી તરફ ધરપકડ અને રિમાન્ડ વિરુદ્ધ કેજરીવાલની અરજી પર દિલ્હી હાઈકોર્ટ આજે પોતાનો ચુકાદો આપી શકે છે. દિલ્હી હાઈકોર્ટે બુધવારે અરજી પર સુનાવણી કર્યા બાદ પોતાનો નિર્ણય સુરક્ષિત રાખ્યો હતો. બુધવારે જ્યારે સુનાવણી શરૂ થઈ ત્યારે કેજરીવાલના વકીલ અભિષેક મનુ સિંઘવીએ સૌથી પહેલા પોતાનો પક્ષ રજૂ કર્યો હતો. ત્યારબાદ લંચ બાદ એડિશનલ સોલિસિટર જનરલ એસવી રાજુએ ED વતી કોર્ટમાં દલીલો કરી હતી. કેજરીવાલના વકીલ સિંઘવીએ હાઈકોર્ટમાં કહ્યું કે સામાન્ય ચૂંટણી આવી ગઈ છે તેથી કેજરીવાલની આવા સમયે ધરપકડ કરવામાં આવી છે જેથી તેઓ ચૂંટણી પ્રચાર કે પ્રચારનો ભાગ ન બની શકે. કેજરીવાલના વકીલે કહ્યું કે કોર્ટે એ જોવું પડશે કે ચૂંટણીમાં તમામ પક્ષોને સમાન તક મળે. પ્રથમ સમન્સ નવેમ્બરમાં આપવામાં આવ્યું હતું અને માર્ચમાં તેમની ધરપકડ કરવામાં આવી હતી. ED પાસે PMLA હેઠળ ધરપકડના વોરંટ આપવા માટે કોઈ પુરાવા નથી. આ નિવેદન પર EDએ વિરોધ કર્યો હતો.
અરવિંદ કેજરીવાલે 23 માર્ચે તેમની ધરપકડ વિરુદ્ધ હાઈકોર્ટમાં અરજી કરી હતી. હાઈકોર્ટે 27 માર્ચે EDને નોટિસ પાઠવી હતી અને 2 એપ્રિલ સુધીમાં જવાબ માંગ્યો હતો. કેજરીવાલે પોતાની ધરપકડ સિવાય રાઉઝ એવન્યુ કોર્ટના રિમાન્ડના નિર્ણયને પણ પડકાર્યો છે. તેમની 21 માર્ચે ધરપકડ કરવામાં આવી હતી. બીજા દિવસે રાઉઝ એવન્યુ કોર્ટે તેમને 28 માર્ચ સુધી ED રિમાન્ડ પર મોકલ્યા હતા. જે પછીથી 1 એપ્રિલ સુધી લંબાવવામાં આવ્યા. 1 એપ્રિલે કોર્ટે તેમને 15 એપ્રિલ સુધી ન્યાયિક કસ્ટડીમાં તિહાર મોકલી દીધા હતા.
