નવી દિલ્હી: આમ આદમી પાર્ટી (AAP)ના રાજ્યસભા સાંસદ સંજય સિંહને (Sanjay Singh) દિલ્હી હાઈકોર્ટ (Delhi HighCourt) તરફથી મોટો ઝટકો લાગ્યો છે. હાઈકોર્ટે શુક્રવારે કથિત દારૂ કૌભાંડ (Alcohol Scam) સંબંધિત મની લોન્ડરિંગ કેસમાં તેમની ધરપકડ (Arrest) અને ED રિમાન્ડને પડકારતી તેમની અરજીને ફગાવી દીધી હતી. આ પહેલા એન્ફોર્સમેન્ટ ડિરેક્ટોરેટ (ED) એ સંજય સિંહની ધરપકડને પડકારતી અરજીનો ગુરુવારે હાઈકોર્ટમાં વિરોધ કર્યો હતો. EDએ 4 ઓક્ટોબરે સંજય સિંહની ધરપકડ કરી હતી.
સંજય સિંહની અરજી પર સુનાવણી કર્યા બાદ જસ્ટિસ સ્વર્ણકાંતા શર્માની કોર્ટે ગુરુવારે નિર્ણય સુરક્ષિત રાખ્યો હતો. સુનાવણી દરમિયાન EDએ સંજય સિંહની અરજીનો વિરોધ કર્યો હતો અને કહ્યું હતું કે તેમની વિરુદ્ધ મની લોન્ડરિંગનો કેસ કરવામાં આવ્યો હતો, તેથી તેમની ધરપકડ કરવામાં આવી છે. EDએ કથિત દિલ્હી નીતિ કૌભાંડ કેસ સાથે સંબંધિત મની લોન્ડરિંગ તપાસના સંબંધમાં AAP સાંસદ સંજય સિંહની ધરપકડ કરી હતી.
ધરપકડ બાદ EDએ સંજય સિંહને 5 ઓક્ટોબરે રાઉઝ એવન્યુ કોર્ટમાં રજૂ કર્યો હતો. જ્યાંથી કોર્ટે સંજય સિંહને પહેલા 10 ઓક્ટોબર સુધી અને પછી 13 ઓક્ટોબર સુધી ED રિમાન્ડ પર મોકલી આપ્યો હતો. 13 ઓક્ટોબરે ED રિમાન્ડની મુદત પૂરી થયા બાદ સંજય સિંહને જ્યુડિશિયલ કસ્ટડીમાં મોકલવામાં આવ્યો હતો. આ પછી સંજય સિંહે 13 ઓક્ટોબરે દિલ્હી હાઈકોર્ટમાં પિટિશન દાખલ કરીને તેના રિમાન્ડ અને ધરપકડને પડકારી હતી, પરંતુ હવે તેમને ત્યાંથી પણ રાહત મળી નથી.
અગાઉ સંજય સિંહના વકીલ મોહિત માથુરે ED દ્વારા કરાયેલી ધરપકડ સામે સખત વાંધો ઉઠાવ્યો છે. વકીલે પૂછ્યું કે EDએ પોતે કબૂલ્યું છે કે આ કેસમાં સંજય સિંહને અગાઉ ક્યારેય સમન્સ જારી કરવામાં આવ્યું નથી. પછી બધું એક જ દિવસમાં થયું. તેમણે કહ્યું કે દિનેશ અરોરા છેલ્લા એક વર્ષથી તેમની સાથે છે, સમીર મહેન્દ્રુ સીબીઆઈ અને ઈડી કેસમાં આરોપી છે, તેમને જામીન મળ્યા છે પરંતુ જામીનનો કોઈ વિરોધ કરવામાં આવ્યો નથી. સમીર મહેન્દ્રુ પર 3 કરોડ રૂપિયાની ઉચાપત કરવાનો આરોપ છે પરંતુ તેની ધરપકડ કરવામાં આવી નથી. વકીલે કહ્યું કે જ્યારે પણ તપાસ એજન્સી કોઈને પકડવાનું વિચારે છે ત્યારે તેઓ જૂના નિવેદનો બહાર લાવે છે. સંજય સિંહે સુનાવણી દરમિયાન કહ્યું કે તે ત્યારથી અમારી સાથે રમી રહ્યો છે.
