સુરત જિલ્લામાં (Surat District) આગામી 26થી 30 મે સુધી પાંચ દિવસ દરમ્યાન વાદળછાયું વાતાવરણ (Cloudy weather) રહેવાની સંભાવના જિલ્લા કૃષિ હવામાન વિભાગ દ્વારા વ્યક્ત કરવામાં આવી છે. આ દિવસો દરમ્યાન જિલ્લાના કેટલાક તાલુકાઓમાં હળવા વરસાદની (Rain) આગાહી કરવામાં આવી છે. આ આગાહી આગામી 26થી 30મી મે સુધી કરવામાં આવી છે.
હવામાન ખાતાએ કરેલી આગાહી મુજબ આ દિવસો દરમ્યાન જિલ્લામાં સરેરાશ મહત્તમ તાપમાન 34 થી 36 સે. અને લઘુત્તમ તાપમાન 27 થી 28 સે.ની વચ્ચે રહેવાની સંભાવના છે. જ્યારે હવામાં સરેરાશ ભેજનું પ્રમાણ 39થી 79 ટકા રહેશે. તેમજ નૈઋત્ય દિશા તરફથી 20 થી 28 કિમી પ્રતિ કલાકની ઝડપે પવનો ફૂંકાવાની સંભાવના રહેલી છે. જોકે કેટલીક જગ્યાએ હળવાથી સામાન્ય વરસાદ થઈ શકે છે.
તાલુકા કક્ષાના હવામાનની આગાહીની વાત કરવામાં આવે તો બારડોલી તાલુકામાં વાદળછાયા વાતાવરણ વચ્ચે આગામી 28મીના રોજ અતિ હળવા વરસાદ પડી શકે છે. ચોર્યાસી અને માંગરોળ તાલુકામાં 27મીના રોજ અતિ હળવા વરસાદની આગાહી કરવામાં આવી છે. કામરેજ, ઉમરપાડા અને પલસાણા તાલુકામાં 27 અને 28 એમ બે દિવસો દરમ્યાન અતિ હળવા વરસાદ પાડવાની સંભાવના હવામાન ખાતે દ્વારા વ્યક્ત કરવામાં આવી છે. મહુવા, માંડવી અને ઓલપાડ તાલુકામાં વાદળો છવાયેલા રહેશે પરંતુ વરસાદ પાડવાની સંભવના નથી.
જ્યારે ગુજરાતના વિવિધ વિસ્તારોમાં હવામાન વિભાગે ફરી એકવાર કમોસમી વરસાદની આગાહી કરી છે. 27થી 28 વચ્ચે ભારેથી અતિ ભારે વરસાદની આગાહી વ્યક્ત કરી છે. ઉત્તર ગુજરાત, કચ્છ, સૌરાષ્ટ્ર, દક્ષિણ ગુજરાત અને દીવમાં વાદળછાયુ વાતાવરણ રહેશે. આ ઉપરાંત અમદાવાદ અને સુરેન્દ્રનગરમાં વાવાઝોડા સાથે વરસાદી માહોલની આગાહી કરવામાં આવી છે. હાલમાં દક્ષિણ પશ્ચિમ દિશાના પવન ફૂંકાઇ રહ્યો છે. જેના કારણે ભેજનું પ્રમાણ સવારે 79 અને સાંજે 49 ટકા ઉંચુ રહે છે.
