ઉમરેઠ તાલુકાના ખાનકુવા ગામમાં ખેતરાળુ વિસ્તારમાં ગુરૂવારની બપોરે એકાએક ધડાકા સાથે આકાશમાંથી ગોળા પડ્યાં હતાં. ફૂટબોલથી થોડા મોટા કદના અને ધાતુના બનેલા આ ગોળો જમીન પર પડતા મોટો અવાજ થયો હતો. જેનાથી આસપાસના ગ્રામજનો કુતૂહલવશ દોડી આવ્યાં હતાં. જોકે, આવા પદાર્થ ખાનકુવા ઉપરાંત દાગજીપુરા, શીલી ગામમાં પણ પડ્યાં હોવાનું જાણવા મળ્યું હતું. આ ઘટનાના પગલે સ્થાનિક પોલીસ પણ સ્થળ પર પહોંચી હતી અને પદાર્થો અંગે તપાસ હાથ ધરી હતી.
