સોનાની દાણચોરીના કેસમાં કન્નડ અભિનેત્રી પકડાઈ છે. બેંગ્લુરુમાં ડિરેક્ટોરેટ ઓફ રેવન્યુ ઈન્ટેલિજન્સ (ડીઆરઆઈ)એ કન્નડ અભિનેત્રી રાણ્યા રાવની કેમ્પેગૌડા આંતરરાષ્ટ્રીય એરપોર્ટ પર 14.8 કિલો દાણચોરીના સોના સાથે ધરપકડ કરી છે. વારંવાર આંતરરાષ્ટ્રીય પ્રવાસોને કારણે ડીઆરઆઈની નજર રાણ્યા પર હતી. 3 માર્ચની રાત્રે જ્યારે તેની ધરપકડ કરવામાં આવી ત્યારે તે દુબઈથી અમીરાતની ફ્લાઇટમાં બેંગલુરુ આવી હતી.
ડીઆરઆઈ અધિકારીઓએ જણાવ્યું હતું કે અભિનેત્રી રાણ્યા રાવે મોટાભાગનું સોનું શરીર પર પહેર્યું હતું અને તેના કપડાંમાં સોનાની લગડી પણ છુપાવી હતી. રાણ્યા આઈપીએસ રામચંદ્ર રાવની પુત્રી છે, જે હાલમાં કર્ણાટક પોલીસના ડીજીપી હાઉસિંગ કોર્પોરેશન તરીકે ફરજ બજાવી રહ્યા છે. ડીઆરઆઈના અધિકારીઓ તપાસ કરી રહ્યા છે કે શું રાણ્યાને સોનાની દાણચોરીમાં પોલીસ કે અન્ય કાયદા અમલીકરણ એજન્સીઓ તરફથી કોઈ મદદ મળી રહી હતી.
ડીઆરઆઈના જણાવ્યા અનુસાર એરપોર્ટ પર પહોંચ્યા પછી રાણ્યા રાવ પોતાને ડીપીજીની પુત્રી તરીકે ઓળખાવતી હતી અને સ્થાનિક પોલીસ કર્મચારીઓને ઘરે મૂકવા માટે બોલાવતી હતી. ડીઆરઆઈ હવે તપાસ કરી રહી છે કે શું આ પોલીસ કર્મચારીઓની દાણચોરીના નેટવર્કમાં કોઈ સંડોવણી હતી કે અજાણતાં તેનો ઉપયોગ થઈ રહ્યો હતો. રાણ્યા કન્નડ સુપરસ્ટાર સુદીપ સાથે ફિલ્મ ‘માનિક્ય’ માં તેની ભૂમિકા માટે જાણીતી છે. તેમણે દક્ષિણ ભારતીય ફિલ્મોમાં પણ કામ કર્યું છે.
ડીઆરઆઈએ નોંધ્યું છે કે રાણ્યા છેલ્લા 15 દિવસમાં ચાર વખત દુબઈ ગઈ હતી. જેના લીધે એજન્સીને તેની પર શંકા થઈ હતી. ડીઆરઆઈએ અભિનેત્રીની ગતિવિધિઓ પર નજર રાખવાનું શરૂ કર્યું હતું. એજન્સીને ગુપ્ત માહિતી મળી હતી કે તે દુબઈથી બેંગલુરુ આવી રહી છે અને તેની સાથે મોટી માત્રામાં સોનું લઈને જઈ રહી છે.
આ ગુપ્ત માહિતીના આધારે એજન્સીએ અભિનેત્રી રાણ્યા રાવને કેમ્પેગૌડા આંતરરાષ્ટ્રીય વિમાનમથક પર પહોંચતા અટકાવી અને તેની તપાસ કરી અને તેની પાસેથી 14.8 કિલો સોનું જપ્ત કર્યું. આ સોનાની બજાર કિંમત લગભગ 12 કરોડ રૂપિયા છે.
રાણ્યા રાવને 14 દિવસની જ્યુડિશિયલ કસ્ટડીમાં મોકલાઈ
એવું પણ કહેવાય છે કે તેણે પોતાના જેકેટમાં સોનું છુપાવ્યું હતું. રાણ્યાની ધરપકડ બાદ તેને વધુ પૂછપરછ માટે બેંગલુરુમાં ડીઆરઆઈ મુખ્યાલય લઈ જવામાં આવી. આ પછી તેને મંગળવારે બેંગલુરુ કોર્ટમાં રજૂ કરવામાં આવી હતી. કોર્ટે અભિનેત્રીને 14 દિવસની ન્યાયિક કસ્ટડીમાં મોકલી દીધી છે. ડીઆરઆઈના અધિકારીઓ તપાસ કરી રહ્યા છે કે શું તે એકલી કામ કરતી હતી કે દુબઈ અને ભારત વચ્ચે કાર્યરત મોટા સોનાની દાણચોરીના નેટવર્કનો ભાગ હતી.
