એશિયા કપ 2025 UAE માં રમાશે. આ ટુર્નામેન્ટ 9 સપ્ટેમ્બરથી શરૂ થશે અને ફાઇનલ 28 સપ્ટેમ્બરે રમાશે. એશિયન ક્રિકેટ કાઉન્સિલ (ACC) ના પ્રમુખ મોહસીન નકવીએ આ માહિતી આપી છે. સમગ્ર મેચનું શેડ્યૂલ ટૂંક સમયમાં જાહેર કરવામાં આવશે.
ભારતને એશિયા કપ 2025 નું આયોજન મળ્યું છે પરંતુ ભારત અને પાકિસ્તાન વચ્ચેના ખરાબ સંબંધોને કારણે, તે તટસ્થ સ્થળે રમાશે. આ ટુર્નામેન્ટ T20 ફોર્મેટમાં હશે. એશિયા કપ 2023 નું આયોજન પાકિસ્તાન દ્વારા કરવામાં આવ્યું હતું. જોકે ભારતે સુરક્ષા કારણોસર પાકિસ્તાનનો પ્રવાસ કરવાનો ઇનકાર કર્યો હતો પરંતુ તે પછી તે હાઇબ્રિડ મોડેલમાં રમાયો હતો. ભારતના બધા મેચ શ્રીલંકામાં યોજાયા હતા.
ભારત પાકિસ્તાન આ દિવસે ટકરાશે
ભારત, પાકિસ્તાન, ઓમાન અને યુએઈને એક જ ગ્રુપમાં રાખવામાં આવ્યા છે. ગ્રુપ બીમાં શ્રીલંકા, બાંગ્લાદેશ, અફઘાનિસ્તાન અને હોંગકોંગ છે. ગ્રુપમાં બધી ટીમો એકબીજા સામે 1-1 મેચ રમશે. ભારત 10 સપ્ટેમ્બરે યુએઈ, 14 સપ્ટેમ્બરે પાકિસ્તાન અને 19 સપ્ટેમ્બરે ઓમાન સામે ટકરાશે. જો ભારત અને પાકિસ્તાન સુપર-4 સ્ટેજમાં પ્રવેશ કરે છે તો 21 સપ્ટેમ્બરે બંને ટીમો ફરી એકવાર એકબીજા સામે ટકરાશે. ટૂર્નામેન્ટની ફાઇનલ 28 સપ્ટેમ્બરે રમાશે. જો ભારત અને પાકિસ્તાન સુપર-4 સ્ટેજમાં ટોચ પર રહે છે તો ટૂર્નામેન્ટમાં બંને વચ્ચે ત્રીજી મેચ થઈ શકે છે.
ભારતે એશિયા કપ 8 વખત જીત્યો
એશિયા કપ 1984 માં શરૂ થયો હતો. અત્યાર સુધીમાં આ ટુર્નામેન્ટ 16 વખત રમાઈ ચૂકી છે. ભારતે સૌથી વધુ 8 વખત જીત મેળવી છે. શ્રીલંકા 6 વખત અને પાકિસ્તાન 2 વખત આ ટુર્નામેન્ટ જીતી ચૂક્યું છે.
આ વર્ષે ફેબ્રુઆરી-માર્ચમાં યોજાયેલી ચેમ્પિયન્સ ટ્રોફી માટે ટીમ ઈન્ડિયા પાકિસ્તાન ગઈ ન હતી. ભારતના બધા મેચ યુએઈમાં યોજાયા હતા. એટલું જ નહીં એક સેમિફાઇનલ અને ફાઇનલ પણ યુએઈમાં યોજાઈ હતી. ફાઇનલમાં ન્યુઝીલેન્ડને હરાવીને ભારતે ટાઇટલ જીત્યું હતું.
શેડ્યૂલ 1-2 દિવસમાં જાહેર કરવામાં આવશે
ક્રિકબઝે એશિયા કપના શેડ્યૂલ અંગેના એક અહેવાલમાં ખુલાસો કર્યો છે કે એશિયા કપ અંગેની પરિસ્થિતિ હવે સુધરી રહી છે અને શેડ્યૂલની જાહેરાત માત્ર ઔપચારિકતા બની ગઈ છે. તાજેતરમાં ઢાકામાં યોજાયેલી એશિયન ક્રિકેટ કાઉન્સિલ (ACC) ની બેઠક બાદ આ મહત્વપૂર્ણ માહિતી પ્રકાશમાં આવી છે. તમને જણાવી દઈએ કે ભારત, પાકિસ્તાન અને બાંગ્લાદેશ વચ્ચે ચાલી રહેલા રાજદ્વારી તણાવને કારણે આ બેઠક પણ વિવાદમાં હતી. જો કે હવે મામલો ઉકેલાઈ ગયો હોય તેવું લાગે છે.
રિપોર્ટ અનુસાર એશિયા કપનું શેડ્યૂલ એક સાથે જાહેર નહીં થાય પરંતુ બે તબક્કામાં જાહેર કરવામાં આવશે. આંશિક જાહેરાત શનિવારે એટલે કે 26 જુલાઈના રોજ થઈ ગઈ છે જ્યારે બાકીનું સમયપત્રક 28 જુલાઈ સુધીમાં જાહેર કરવામાં આવશે.
