રેલ્વે મંત્રાલય દ્વારા એક નવી સુપર એપ લોન્ચ કરવામાં આવી છે, જેનું નામ SwaRail છે. આ એપ પર મુસાફરોને રેલવે દ્વારા સામાન્ય જનતાને આપવામાં આવતી તમામ સેવાઓનો ઍક્સેસ મળશે. ભારતીય રેલ્વેની આ નવી સુપર એપ સેન્ટર ફોર રેલ્વે ઇન્ફોર્મેશન સિસ્ટમ્સ (CRIS) દ્વારા વિકસાવવામાં આવી છે અને હાલમાં તે પ્લે સ્ટોર પર બીટા પ્રોગ્રામમાં છે.
રેલવેની આ સુપર એપ તે બધી સેવાઓ પૂરી પાડશે જે હાલમાં વિવિધ એપ્સ દ્વારા ઉપલબ્ધ છે. તેની મદદથી રિઝર્વેશન અને અનરિઝર્વ્ડ ટિકિટ બુક કરી શકાશે. આ એપ પર પ્લેટફોર્મ ટિકિટ, પાર્સલ બુકિંગ અને PNR વિશે માહિતી મેળવી શકાશે. જોકે, આ એપ પછી IRCTC એપ બંધ થશે કે તે ચાલુ રહેશે તે અંગે હજુ સુધી કોઈ સત્તાવાર માહિતી નથી .
રેલવેની આ સુપર એપ હેઠળ ટિકિટ બુકિંગ, અનરિઝર્વ્ડ ટિકિટ, પ્લેટફોર્મ ટિકિટ, પાર્સલ બુકિંગ, પીએનઆર માહિતી, ફૂડ ઓર્ડર અને ફરિયાદ વગેરે સેવાઓનો લાભ મુસાફરો લઈ શકશે. રેલવેની આ નવી સુપર એપ હેઠળ યુઝર્સને ટ્રાવેલ આસિસ્ટન્ટ ફીચર પણ મળશે, જેમાં સિંગલ સાઇન-ઓન, ઓનબોર્ડિંગ અને અન્ય ઘણી સુવિધાઓ રેલ્વે મુસાફરો માટે ઉપલબ્ધ હશે.
અહીં યુઝર્સને અલગ અલગ એપ્સ માટે અલગ અલગ લોગિન આઈડી અને પાસવર્ડ યાદ રાખવાની જરૂર રહેશે નહીં. સરળ સાઇન ઇનની મદદથી મુસાફરો સરળતાથી લોગિન કરી શકશે. નવા યુઝર્સે શરૂઆતમાં કેટલીક મહત્વપૂર્ણ વિગતો દાખલ કરવી પડશે.
એપ ક્યારે ડાઉનલોડ કરી શકાશે?
આ એપ હાલમાં બીટા ટેસ્ટિંગમાં છે. અહેવાલો અનુસાર એન્ડ્રોઇડ અને એપ સ્ટોર પર બીટા ટેસ્ટિંગ સ્લોટ ભરાઈ ગયા છે. જોકે, સ્ટેબલ વર્ઝનમાં ક્યારે લોન્ચ થશે તે અંગે કોઈ સત્તાવાર માહિતી આપવામાં આવી નથી.
સુપર એપ SwaRail શું છે?
ભારતીય રેલ્વેની સુપર એપ SwaRail એક એવું પ્લેટફોર્મ છે જ્યાં યુઝર્સને એક જ એપ પર બધી સેવાઓ મળશે. હાલમાં રેલ્વે સેવાઓ માટે વિવિધ એપ્લિકેશનો છે, જેને એક સુપર એપ્લિકેશનની મદદથી એક છત્ર હેઠળ લાવવાની જરૂર છે. આ બિલકુલ ચીનના WeChat જેવું હશે, જ્યાં યુઝર્સને એક જ મોબાઇલ એપ્લિકેશનમાં બધા પ્લેટફોર્મની સેવાઓ મળશે. અહીં યુઝર્સ પેમેન્ટ સર્વિસ, સોશિયલ મીડિયા પ્લેટફોર્મ, વિડિઓ પ્લેટફોર્મ અને મૂવી ટિકિટ બુકિંગ વગેરે જેવી સેવાઓનો અનુભવ કરી શકે છે.
