નવી દિલ્હી: (New Delhi) જમીયત ઉલેમા-એ-હિંદના પ્રમુખ મૌલાના અરશદ મદનીએ (Maulana Arshad Madani) ઉત્તરાખંડમાં સમાન નાગરિક સંહિતા લાગુ કરવાના રાજ્ય સરકારના નિર્ણય પર આકરી પ્રતિક્રિયા વ્યક્ત કરી છે. મૌલાના અરશદ મદનીએ યુસીસી પર કહ્યું કે અમે એવા કોઈપણ કાયદાને સ્વીકારતા નથી જે શરિયતની વિરુદ્ધ હોય, કારણ કે એક મુસ્લિમ દરેક વસ્તુ સાથે સમાધાન કરી શકે છે પરંતુ શરિયત સાથે નહીં. તેમણે કહ્યું કે સત્ય એ છે કે કોઈપણ ધર્મનો અનુયાયી તેની ધાર્મિક પ્રવૃત્તિઓમાં કોઈપણ પ્રકારની અયોગ્ય દખલગીરી સહન કરી શકતો નથી.
UCC બંધારણના મૂળભૂત અધિકારોને નકારે છે- મદની
મૌલાના મદનીએ કહ્યું કે આજે ઉત્તરાખંડમાં સમાન નાગરિક સંહિતા લાવવામાં આવી છે જેમાં અનુસૂચિત જનજાતિને બંધારણના અનુચ્છેદ 366A પ્રકરણ 25A સબસેક્શન 342 હેઠળ નવા કાયદામાંથી મુક્તિ આપવામાં આવી છે. તેમણે કહ્યું કે એવી દલીલ કરવામાં આવી છે કે બંધારણના અનુચ્છેદ 21 હેઠળ તેમના અધિકારોનું રક્ષણ કરવામાં આવ્યું છે. આવી સ્થિતિમાં જ્યારે તેમને આ કાયદાથી દૂર રાખી શકાય છે તો પછી અમને બંધારણની કલમ 25 અને 26 હેઠળ અમને ધાર્મિક સ્વતંત્રતા શા માટે ન આપી શકાય? તેમણે કહ્યું કે જો જોવામાં આવે તો સમાન નાગરિક સંહિતા મૂળભૂત અધિકારોને નકારી કાઢે છે.
સમીક્ષા બાદ કાનૂની કાર્યવાહી અંગે નિર્ણય લેશે
મૌલાના અરશદ મદનીએ કહ્યું, ‘અમારી કાનૂની ટીમ બિલના કાયદાકીય પાસાઓની સમીક્ષા કરશે ત્યાર બાદ કાનૂની કાર્યવાહી અંગે નિર્ણય લેવામાં આવશે. સવાલ મુસ્લિમોના પર્સનલ લોનો નથી પરંતુ વર્તમાન પરિસ્થિતિમાં દેશના બિનસાંપ્રદાયિક બંધારણને જાળવી રાખવાનો છે. કારણ કે ભારત એક બિનસાંપ્રદાયિક દેશ છે અને બંધારણમાં ધર્મનિરપેક્ષતાનો અર્થ એ છે કે દેશનો પોતાનો કોઈ ધર્મ નથી. મૌલાના મદનીએ જણાવ્યું હતું કે આપણો દેશ બહુ-સાંસ્કૃતિક અને બહુ-ધાર્મિક દેશ છે. આ તેની વિશેષતા પણ છે તેથી અહીં એક કાયદો ચાલી શકે નહીં.
મુસ્લિમોના કૌટુંબિક કાયદા માનવીઓ દ્વારા બનાવેલા કાયદા નથી
મૌલાના મદનીએ કહ્યું, ‘અમે સ્પષ્ટ કરવા માંગીએ છીએ કે અમારા પારિવારિક કાયદા માનવીઓ દ્વારા બનાવેલા કાયદા નથી. તેઓ કુરાન અને હદીસ દ્વારા બનાવવામાં આવ્યા છે. આના પર ન્યાયશાસ્ત્રીય ચર્ચા થઈ શકે છે પરંતુ મૂળભૂત સિદ્ધાંતો પર અમને કોઈ મતભેદ નથી. યુનિફોર્મ સિવિલ કોડનો અમલ એ નાગરિકોની ધાર્મિક સ્વતંત્રતા પર હુમલો કરવાનું સુનિયોજિત કાવતરું છે એમ કહેવું બિલકુલ યોગ્ય લાગે છે. સાંપ્રદાયિક શક્તિઓ દરરોજ નવા ધાર્મિક મુદ્દાઓ ઉભા કરીને દેશની લઘુમતીઓને, ખાસ કરીને મુસ્લિમોને ભય અને અરાજકતામાં રાખવા માંગે છે.
