નવી દિલ્હી: દેશમાં કોરોનાના (Corona) વધી રહેલા કેસ ચિંતામાં સતત વધારો કરી રહ્યા છે. કેન્દ્રીય સ્વાસ્થ્ય મંત્રાલયે (Union Ministry of Health) શુક્રવારે જણાવ્યું કે દેશમાં છેલ્લા 24 કલાકમાં કોરોનાના કુલ 797 નવા કેસ સામે આવ્યા છે. છેલ્લા સાત મહિનામાં એક દિવસમાં મળી આવેલા દર્દીઓની આ સૌથી મોટી સંખ્યા છે. આ સાથે દેશમાં કોરોનાના સક્રિય કેસ વધીને 4091 થઈ ગયા છે. છેલ્લા 24 કલાકમાં કોરોનાને કારણે પાંચ લોકોના મોત થયા છે.
દેશમાં કોરોનાના નવા પ્રકાર, JN.1 નો ખતરો પણ સતત વધી રહ્યો છે. ગુરુવાર સુધીમાં, દેશમાં JN.1 થી સંક્રમિત દર્દીઓની સંખ્યા 145 પર પહોંચી ગઈ છે. જેએન.1 દર્દીઓનો આ ડેટા 21 નવેમ્બરથી 18 ડિસેમ્બર વચ્ચેનો છે. આ પહેલા દેશમાં 19 મેના રોજ એક જ દિવસમાં કોરોનાના 865 કેસ નોંધાયા હતા.
ત્યાર પછી દેશમાં કોરોના દર્દીઓની સંખ્યામાં સતત ઘટાડો જોવા મળી રહ્યો છે, પરંતુ 5 ડિસેમ્બર પછી કોરોનાના કેસ ફરીથી વધવા લાગ્યા અને હવે તે ચિંતાજનક ગતિ પકડી રહ્યું છે. છેલ્લા 24 કલાકમાં કોરોનાથી મૃત્યુ પામેલા દર્દીઓમાં બે કેરળના અને એક-એક મહારાષ્ટ્ર, પુડુચેરી અને તમિલનાડુના છે.
કોવિડ JN.1નું નવું સ્વરૂપ કેટલું જોખમી છે?
JN.1 સબ-વેરિઅન્ટ વિશે એવું કહેવામાં આવી રહ્યું છે કે તે ખૂબ જ ઝડપથી ફેલાય છે પરંતુ તેનાથી થનારો ચેપ એકદમ હળવો છે. WHO ના ભૂતપૂર્વ વૈજ્ઞાનિક અને ICMR ના ભૂતપૂર્વ મહાનિર્દેશક ડૉ. સૌમ્યા સ્વામીનાથને કહ્યું હતું કે JN.1 કેટલો ગંભીર છે તે જાણવા માટે અમારી પાસે હજી પૂરતો ડેટા નથી. આપણે ચિંતા કરવાની જરૂર નથી પણ સાવધાન રહેવાની જરૂર છે. તે જ સમયે, અમે એમ કહી શકતા નથી કે તે ન્યુમોનિયા અથવા મૃત્યુનું કારણ બની શકે છે.
