નવી દિલ્હી: ભારત (India) અને કેનેડા (Canada) વચ્ચેના સંબંધો સુધરવાની પહેલ થઇ ગઇ છે. ખરેખર ભારતે કેનેડિયન નાગરિકો માટે ફરીથી ઈ-વિઝા (E-Visa) સેવાઓ શરૂ કરી છે. સૂત્રોના હવાલાથી આ માહિતી બહાર આવી છે. સપ્ટેમ્બરમાં ભારત અને કેનેડા વચ્ચે ચાલી રહેલા તણાવને કારણે બંને દેશોના રાજદ્વારીઓને હાંકી કાઢવામાં આવ્યા હતા. જે બાદ ભારતે કેનેડા માટે વિઝા સેવા સસ્પેન્ડ કરી દીધી હતી.
ખાલિસ્તાની આતંકવાદી હરદીપ સિંહ નિજ્જરને જૂનમાં બ્રિટિશ કોલંબિયાના સરેમાં ગુરુદ્વારાની બહાર ગોળી મારીને હત્યા કરવામાં આવી હતી. કેનેડાના પીએમ જસ્ટિન ટ્રુડોએ આ હત્યા માટે ભારતીય એજન્ટોને જવાબદાર ઠેરવ્યા હતા અને કહ્યું હતું કે આ હત્યામાં તેમનો હાથ છે. જો કે ભારતે આ આરોપોને સખત શબ્દોમાં નકારી કાઢ્યા હતા.
નોંધનીય છે કે ભારત-કેનેડા વિવાદ બાદ પીએમ મોદી અને કેનેડાના પીએમ જસ્ટિન ટ્રુડો પહેલીવાર મળવા જઈ રહ્યા છે. બંને નેતાઓની આ મુલાકાત G-20ની વર્ચ્યુઅલ સમિટમાં થવા જઈ રહી છે. આવી સ્થિતિમાં મીટિંગ પહેલા જ ભારતનાં આ પગલાની દરેક જગ્યાએ ચર્ચા થઈ રહી છે કે તેણે મિત્રતાનો હાથ લંબાવ્યો છે. 21 સપ્ટેમ્બરે ભારતે કેનેડિયન નાગરિકો માટે ઈ-વિઝા સેવા પર પ્રતિબંધ મૂક્યો હતો.
તાજેતરમાં કેનેડામાં ખાલિસ્તાની આતંકવાદી હરદીપ સિંહ નિજ્જરની હત્યા પર વિદેશ મંત્રી એસ. જયશંકરનું નિવેદન બહાર આવ્યું હતું. તેમણે બુધવારે કહ્યું હતું કે ભારત કોઈપણ તપાસનો ઇનકાર કરી રહ્યું નથી. આ સાથે, તેણે નિજ્જરની હત્યામાં ભારત સરકારના એજન્ટોની સંડોવણીના કેનેડાના આરોપો પર પુરાવા આપવા કહ્યું. જયશંકરે લંડનમાં પત્રકાર લિયોનેલ બાર્બર સાથે ‘હાઉ અ બિલિયન પીપલ સી ધ વર્લ્ડ’ શીર્ષકવાળી ઇવેન્ટમાં પ્રશ્નોના જવાબમાં આ ટિપ્પણી કરી હતી.
બ્રિટનની 5 દિવસની સત્તાવાર મુલાકાતે લંડન પહોંચેલા જયશંકરે એક પ્રશ્નના જવાબમાં કહ્યું કે જો તમારી પાસે આવો આરોપ લગાવવાનું કોઈ કારણ હોય તો કૃપા કરીને પુરાવા શેર કરો કારણ કે અમે તપાસનો ઇનકાર કરી રહ્યા નથી.’ પરંતુ ભારપૂર્વક જણાવ્યું હતું કે કેનેડાએ તેના આરોપને સમર્થન આપવા માટે ભારત સાથે કોઈ પુરાવા શેર કર્યા નથી. કેનેડાના બ્રિટિશ કોલંબિયામાં 18 જૂને ખાલિસ્તાની આતંકવાદી હરદીપ સિંહ નિજ્જરની હત્યામાં ભારતીય એજન્ટની ‘સંભવિત’ સંડોવણી અંગે સપ્ટેમ્બરમાં કેનેડાના વડા પ્રધાન જસ્ટિન ટ્રુડોના આરોપોને પગલે ભારત અને કેનેડા વચ્ચેના સંબંધો વણસ્યા હતા. ભારતે 2020માં નિજ્જરને આતંકવાદી જાહેર કર્યો હતો.
