નવી દિલ્હી: હિંડનબર્ગના (Hindenburg Reports) ખુલાસા બાદ અદાણી ગ્રુપના (Adani Group) શેરમાં (Share) જોરદાર ઘટાડો જોવા મળી રહ્યો છે. ત્યારે હવે અદાણી ગ્રુપને વધુ એક મોટો ઝટકો લાગ્યો છે. ઉત્તર પ્રદેશ (Uttar Pradesh) સરકારે અદાણી ગ્રુપને જોરદાર ઝટકો આપ્યો છે. અદાણી ટ્રાન્સમિશન દ્વારા પ્રાપ્ત પ્રીપેડ સ્માર્ટ મીટર (Prepaid Smart Meter) માટેનું ટેન્ડર રદ (Tender cancel ) કરવામાં આવ્યું છે. ઉત્તર પ્રદેશમાં 2.5 કરોડ પ્રીપેડ સ્માર્ટ મીટર લગાવવાના ટેન્ડરની કિંમત 25 હજાર કરોડ હતી.
મળતી માહિતી અનુસાર મધ્યાંચલ વિદ્યુત વિતરન નિગમે ટેન્ડર રદ કર્યું છે. માત્ર મધ્યાંચલ વિદ્યુત વિતરન નિગમનું 5454 કરોડનું ટેન્ડર હતું. ટેન્ડરની અંદાજિત કિંમત 48 થી 65 ટકા જેટલી વધારે હતી, જેના કારણે શરૂઆતમાં જ તેનો વિરોધ કરવામાં આવ્યો હતો. મીટરની કિંમત આશરે 9 થી 10 હજાર રૂપિયા હતી જ્યારે અંદાજિત કિંમત પ્રતિ મીટર 6 હજાર હતી.
મેકર્સ અદાણી પાવર ટ્રાન્સમિશન ઉપરાંત, જીએમઆર અને ઇન્ટેલી સ્માર્ટ કંપનીએ ટેન્ડરનો ભાગ 2 જીતી લીધો હતો અને તેમને કામ કરવાનો ઓર્ડર આપવામાં આવનાર હતો. રાજ્ય ગ્રાહક પરિષદે મોંઘા મીટર લગાવવાની વાત કરી હતી અને કાઉન્સિલે રેગ્યુલેટરી કમિશનમાં અરજી પણ કરી હતી. આ ફરિયાદ મુખ્યમંત્રી યોગી આદિત્યનાથને કરવામાં આવી હતી.
તમામ આરોપો વચ્ચે મધ્યાંચલ વિદ્યુત વિતરન નિગમના સુપરિન્ટેન્ડિંગ એન્જિનિયર ફાયનાન્સ અશોક કુમારે અદાણી ગ્રુપનું ટેન્ડર રદ કર્યું હતું. એવું કહેવામાં આવ્યું છે કે ટેક્નિકલ કારણોસર ટેન્ડર રદ કરવામાં આવ્યું છે. રાજ્ય વિદ્યુત ગ્રાહક પરિષદે ટેન્ડર રદ કરવાને યોગ્ય ઠેરવ્યું હતું અને કહ્યું હતું કે મોંઘા ટેન્ડર દ્વારા ગ્રાહકો પર વધારાનો બોજ પડશે.
હિન્ડેનબર્ગનો આરોપ
હિન્ડેનબર્ગનો રિપોર્ટ 24 જાન્યુઆરીએ આવ્યો હતો. ત્યારથી અદાણી ગ્રુપની કંપનીઓના શેરમાં જોરદાર ઘટાડો જોવા મળી રહ્યો છે. હિંડનબર્ગે તેના અહેવાલમાં દાવો કર્યો છે કે અદાણી ગ્રુપની લિસ્ટેડ સાત કંપનીઓ 85 ટકા ઓવરવેલ્યુડ છે. અહેવાલમાં એવો પણ દાવો કરવામાં આવ્યો છે કે અદાણી જૂથ દાયકાઓથી સ્ટોક મેનીપ્યુલેશન અને મની લોન્ડરિંગ કરી રહ્યું છે.
સાત દિવસમાં 9 લાખ કરોડ ડૂબી ગયા
હિન્ડેનબર્ગના રિપોર્ટના કારણે અદાણી ગ્રુપે છેલ્લા સાત ટ્રેડિંગ સેશનમાં રૂ. 9 લાખ કરોડનું માર્કેટ કેપ ગુમાવ્યું છે. અદાણી ગ્રૂપના કુલ 10 શેર શેરબજારમાં લિસ્ટેડ છે જેમાં અદાણી પાવર, અદાણી ટોટલ ગેસ, અદાણી વિલ્મર, અદાણી ગ્રીન, અદાણી ટ્રાન્સમિશન, અદાણી પોર્ટ્સ, અદાણી એન્ટરપ્રાઈઝ, અંબુજા સિમેન્ટ્સ, એસીસી અને એનડીટીવીનો સમાવેશ થાય છે. હિન્ડેનબર્ગના રિપોર્ટ બાદ આ શેરોમાં 50 ટકા સુધીનો ઘટાડો થયો છે.
