સંસદનું ચોમાસુ સત્ર ચાલી રહ્યું છે. આ સત્ર 21 ઓગસ્ટ સુધી ચાલશે. સુપ્રિયા સુલે (NCP-SP), રવિ કિશન (BJP), નિશિકાંત દુબે (BJP) અને અરવિંદ સાવંત (શિવસેના-UBT) સહિત 17 સાંસદોને ‘સાંસદ રત્ન’થી સન્માનિત કરવામાં આવશે. આ બધા સાંસદોને લોકસભામાં તેમના અનુકરણીય પ્રદર્શન માટે ‘સાંસદ રત્ન’ સન્માન-2025થી સન્માનિત કરવામાં આવશે.
આ સન્માનોમાં ચાર ખાસ જ્યુરી પુરસ્કારોનો પણ સમાવેશ થાય છે જે સતત ત્રણ ટર્મથી સંસદીય લોકશાહીમાં તેમના સતત યોગદાનને માન્યતા આપે છે. ભર્તૃહરિ મહતાબ (BJP, ઓડિશા), એન કે પ્રેમચંદ્રન (ક્રાંતિકારી સમાજવાદી પાર્ટી, કેરળ), સુપ્રિયા સુલે (NCP-SP, મહારાષ્ટ્ર), અને શ્રીરંગ અપ્પા બારણે (શિવસેના, મહારાષ્ટ્ર) ને વિશેષ પુરસ્કારો આપવામાં આવશે.
આ સાંસદોએ 16મી લોકસભા પછી તેમનું શ્રેષ્ઠ પ્રદર્શન જાળવી રાખ્યું
16મી લોકસભા પછી આ બધાએ પોતાનું શ્રેષ્ઠ પ્રદર્શન જાળવી રાખ્યું છે. સન્માનિત થનારા અન્ય સાંસદોમાં સ્મિતા ઉદય વાઘ (ભાજપ), નરેશ મ્હસ્કે (શિવસેના), વર્ષા ગાયકવાડ (કોંગ્રેસ), મેધા કુલકર્ણી (ભાજપ), પ્રવીણ પટેલ (ભાજપ), વિદ્યુત બરન મહતો (ભાજપ) અને દિલીપ સૈકિયા (ભાજપ)નો સમાવેશ થાય છે.
સમિતિ શ્રેણીમાં ભર્તૃહરિ મહતાબના નેતૃત્વ હેઠળની નાણાં સ્થાયી સમિતિ અને ડૉ. ચરણજીત સિંહ ચન્ની (કોંગ્રેસ)ના નેતૃત્વ હેઠળની કૃષિ સ્થાયી સમિતિને તેમના અહેવાલોની ગુણવત્તા અને કાયદાકીય દેખરેખમાં યોગદાન માટે સન્માનિત કરવામાં આવશે.
