ગ્રામીણ વિસ્તારોના સર્વગ્રાહી વિકાસ માટે મુખ્યમંત્રી ભૂપેન્દ્ર પટેલનો મહત્વપૂર્ણ નિર્ણય
વડોદરા:
રાજ્યના જિલ્લાઓના ગ્રામીણ વિસ્તારોના સર્વગ્રાહી અને સર્વસમાવેશી વિકાસને વેગ આપવા માટે મુખ્યમંત્રી ભુપેન્દ્ર પટેલ દ્વારા મહત્વપૂર્ણ જનહિતલક્ષી નિર્ણય લેવામાં આવ્યો છે. આ નિર્ણય મુજબ રાજ્યની તમામ ૩૪ જિલ્લા પંચાયતોના પ્રમુખોને રૂ. ૧ કરોડની વાર્ષિક વિવેકાધીન ગ્રાન્ટ ફાળવવામાં આવશે, જેનો ઉપયોગ સ્થાનિક અગત્યતા ધરાવતા વિકાસ કામો માટે કરી શકાશે.
મુખ્યમંત્રીએ આ બાબતે સામાન્ય વહીવટ વિભાગને જરૂરી દિશાનિર્દેશો આપ્યા છે. રાજ્યમાં હાલમાં ધારાસભ્યોને વિકેન્દ્રિત જિલ્લા આયોજન કાર્યક્રમ હેઠળ વિકાસ કાર્યો માટે રૂ. ૨.૫ કરોડની ગ્રાન્ટ ફાળવવાની પ્રથા અમલમાં છે. તેવી જ રીતે, જિલ્લા પંચાયતોના પ્રમુખોને પણ વિકાસ કાર્ય માટે સ્વતંત્ર રીતે નિર્ણય લઈ શકાય તે હેતુસર આ વિવેકાધીન ગ્રાન્ટ ફાળવવામાં આવી છે.
જિલ્લા પંચાયતના પ્રમુખોએ પોતાના-પોતાના જિલ્લાઓમાં ગ્રામીણ વિકાસ કાર્યોને વધુ ગતિ મળે અને સ્થાનિક જરૂરિયાત મુજબ અગત્યના કામોને પ્રાથમિકતા આપી શકાય તે માટે મુખ્યમંત્રી સમક્ષ વિવેકાધીન ગ્રાન્ટ ફાળવવાની રજૂઆત કરી હતી. આ રજૂઆતોને મુખ્યમંત્રીએ સકારાત્મક અને ત્વરિત પ્રતિસાદ આપતા રૂ. ૧ કરોડની ગ્રાન્ટ ફાળવવાનો નિર્ણય કર્યો છે.
આ નિર્ણયથી જિલ્લા સ્તરે વિકાસ યોજનાઓ વધુ અસરકારક રીતે અમલમાં આવશે, સ્થાનિક જરૂરિયાતોને ઝડપી પ્રતિભાવ મળશે અને રાજ્યના ગ્રામીણ વિસ્તારોના વિકાસમાં નવી ગતિ આવશે તેવી અપેક્ષા વ્યક્ત કરવામાં આવી છે.
