સાવલી: સાવલી સ્પેશ્યલ પોસ્કો કોર્ટ દ્વારા સગીરા સાથે દુષ્કર્મનાં આરોપીને ૨૦ વર્ષની સખત કેદની સજા અને ૫૦ હજારનો દંડ ફટકાર્યો છે
કોર્ટ સૂત્રો દ્વારા મળતી માહિતી મુજબ તા ૯/૦૫/૨૦૨૩નાં રોજ વાઘોડિયા પોલીસ સ્ટેશનમાં ફરિયાદ નોંધાઈ હતી કે ૧૫ વર્ષ ૧૦ માસની સગીરા તેણીના માતા પિતાની ગેરહાજરીમાં બપોરનાં સમયે ઘરેથી ગુમ થઈ ગઈ હતી અને તપાસ કરતા મળી નહોતી. તે સંબંધી ફરિયાદ નોંધાતા પોલીસે ભોગ બનનાર તથા આરોપીને નવ માસ જેટલા સમય બાદ શોધી કાઢયો હતો અને સગીરા તથા આરોપીની પૂછપરછ કરી હતી. તપાસમાં ખૂલ્યું હતું કે આરોપી સગીરાને ભગાડી જઈ પાવાગઢ તથા સુરત ખાતે લઈ ગયો હતો અને વારંવાર તેની સાથે દુષ્કર્મ કર્યું હતું અને તેને ગર્ભવતી પણ બનાવી હતી. જે બાબતના પુરાવા એકત્રિત કરી આરોપી અરુણ દિલીપભાઈ બારીયા રહેવાસી: વાઘોડિયા ,જી વડોદરાના વિરુદ્ધ સાવલી પોસ્કો કોર્ટમાં ચાર્જશીટ દાખલ કરી હતી. જેનો કેસ સાવલીની પોસ્કો કોર્ટના જજ જે. એ. ઠક્કર સમક્ષ ચાલી જતા આરોપી અરુણ દિલીપભાઈ બારીયા ને કેસ ચલાવી દોષિત ઠેરવ્યો છે અને આરોપી અરુણ દિલીપભાઈ બારીયાને દુષ્કર્મ તથા પોસ્કો એક્ટ ના ગુનામાં તકસીર વાર ઠેરવીને ૨૦ વર્ષની સખત કેદ તથા રૂપિયા 50,000 દંડ ફટકારવામાં હુકમ કર્યો છે. આ સાથે ઇ.પી.કો કલમ 363ના ગુનામાં ત્રણ વર્ષની સખત સજા તથા 3000 દંડ તથા ઇપીકો કલમ ૩૬૬ના ગુનામાં પાંચ વર્ષની સખત તથા રૂપિયા 5,000 નો દંડ ફટકારાયો છે. આરોપી જે દંડની રકમ કોર્ટમાં જમા કરાવશે તે ભોગ બનનારને વળતર તરીકે ચૂકવવા હુકમ કર્યો છે તથા ભોગ બનનારને ડીસ્ટ્રીકટ લીગલ સર્વીસ ઓથોરીટી ને રૂપિયા 7 લાખ રૂપિયા વિક્ટિંમ કોમ્પનસેશન સ્કીમ હેઠળ ચૂકવવા ભલામણ કરી છે
