મુંબઈ: હાલમાં ભારતમાં વન ડે ક્રિકેટ વર્લ્ડ કપનો ઉત્સાહ ચરમસીમા પર છે. ભારતીય ટીમ આ ટુર્નામેન્ટમાં અત્યાર સુધી અજેય રહી છે. ભારત બુધવારે મુંબઈના વાનખેડે સ્ટેડિયમમાં ન્યૂઝીલેન્ડ સાથે તેની સેમીફાઈનલ મેચ રમશે. જો કે આ સેમીફાઈનલ મેચ પહેલા જ મુંબઈ પોલીસને કોઈ મોટી ઘટનાને અંજામ આપવાની ધમકી મળી છે. હાઈપ્રોફાઈલ ઈવેન્ટને લઈને ધમકી મળતાની સાથે જ મુંબઈ પોલીસે આ મામલે તપાસ શરૂ કરી દીધી છે.
મુંબઈના વાનખેડે સ્ટેડિયમમાં યોજાનારી ભારત અને ન્યુઝીલેન્ડની સેમીફાઈનલ મેચ દરમિયાન કોઈ મોટી ઘટનાને અંજામ આપવાની મુંબઈ પોલીસને સોશિયલ મીડિયા પ્લેટફોર્મ X દ્વારા એક અજાણ્યા વ્યક્તિ તરફથી ધમકી મળી છે. ધમકી આપનાર વ્યક્તિએ ટ્વિટર પર મુંબઈ પોલીસને ટેગ કર્યું છે જેમાં એક ફોટોમાં બંદૂક, હેન્ડ ગ્રેનેડ અને ગોળીઓ પણ જોવા મળે છે.
મુંબઈના વાનખેડે સ્ટેડિયમમાં યોજાનારી વર્લ્ડ કપ સેમિફાઇનલ મેચમાં હજારો દર્શકો હાજર રહેશે. આ સિવાય મેચને લઈને ભારે ઉત્તેજના જોવા મળશે. મામલાની ગંભીરતાને ધ્યાનમાં રાખીને મુંબઈ પોલીસે વાનખેડે સ્ટેડિયમ અને આસપાસના વિસ્તારો પર ચાંપતી નજર રાખી છે. એક અજાણ્યા વ્યક્તિએ તેના ટ્વીટમાં એક ફોટો પણ પોસ્ટ કર્યો હતો જેમાં મેસેજ હતો કે તે મેચ દરમિયાન આગ લગાવશે.
ભારતીય ટીમ વન ડે ક્રિકેટ વર્લ્ડ કપ જીતવાથી માત્ર બે ડગલાં દૂર છે. વર્લ્ડકપની સેમીફાઈનલમાં ભારતીય ટીમનો મુકાબલો ન્યુઝીલેન્ડની ટીમ સાથે થવા જઈ રહ્યો છે. આ મેચ આજે 15 નવેમ્બરે મુંબઈના વાનખેડે સ્ટેડિયમમાં બપોરે 2 વાગ્યાથી રમાશે. આ સમગ્ર વિશ્વ કપમાં ભારતીય ટીમ અપરાજિત રહી છે. તેથી ટીમનું મનોબળ ઘણું ઊંચું છે.
