તેલંગાણાના નાગરકુર્નૂલ જિલ્લામાં એક મોટી ટનલ દુર્ઘટના બની છે. અહીં એક ટનલનો એક ભાગ તૂટી પડતાં 6 કામદારો કાટમાળ નીચે ફસાયા છે. કામદારોને બચાવવાની પ્રક્રિયા શરૂ કરવામાં આવી છે. હાલમાં ફસાયેલા કામદારોની સંખ્યા 6 છે કે 8 તે સ્પષ્ટ કરવાના પ્રયાસો ચાલી રહ્યા છે.
મળતી માહિતી મુજબ તેલંગાણાના નાગરકુર્નૂલ જિલ્લામાં શ્રીશૈલમ લેફ્ટ બેંક કેનાલ (SLBC) ના નિર્માણાધીન ભાગમાં શનિવારે આ અકસ્માત થયો હતો. અહીં નહેરની છતનો એક ભાગ તૂટી પડ્યો.
એવું કહેવામાં આવી રહ્યું છે કે બાંધકામ કંપનીની ટીમ આકારણી માટે સુરંગની અંદર ગઈ છે અને ચકાસણી કરી રહી છે. એક સિનીયર પોલીસ અધિકારીએ એજન્સીને જણાવ્યું કે કંપની દ્વારા આપવામાં આવેલી માહિતી અનુસાર 6 થી 8 કામદારો ફસાયેલા હોવાની આશંકા છે.
આ મામલે મુખ્યમંત્રી કાર્યાલય દ્વારા એક નિવેદન જારી કરવામાં આવ્યું છે. નિવેદનમાં કહેવામાં આવ્યું છે કે આ ઘટનામાં ઘણા લોકો ઘાયલ થયા છે. મુખ્યમંત્રી રેવંત રેડ્ડીએ જિલ્લા કલેક્ટર, પોલીસ અધિક્ષક અને અન્ય અધિકારીઓને રાહત કાર્ય માટે ઘટનાસ્થળે પહોંચવાનો નિર્દેશ આપ્યો છે. મુખ્યમંત્રીની સૂચના પર, રાજ્યના સિંચાઈ મંત્રી એન ઉત્તમ કુમાર રેડ્ડી, સિંચાઈ બાબતોના સરકારી સલાહકાર આદિત્યનાથ દાસ અને અન્ય સિંચાઈ અધિકારીઓ ખાસ હેલિકોપ્ટરમાં ઘટનાસ્થળે જવા રવાના થયા છે.
કેન્દ્રીય કોલસા મંત્રી જી કિશન રેડ્ડીએ અકસ્માતના કારણો વિશે માહિતી માંગી અને અધિકારીઓને ફસાયેલા લોકોને સુરક્ષિત રીતે બહાર કાઢવા જણાવ્યું. તેમના કાર્યાલય દ્વારા જારી કરાયેલા એક પ્રકાશનમાં કહેવામાં આવ્યું છે કે તેમણે અધિકારીઓને ઘાયલોને સારવાર આપવા પણ કહ્યું છે.
