બિહારમાં મત ગણતરી ચાલી રહી છે. ચૂંટણી પંચ દ્વારા જાહેર કરાયેલા વલણોએ મહાગઠબંધનને મોટો ફટકો આપ્યો છે, અને NDA જંગી જીત તરફ આગળ વધી રહ્યું છે. બિહારના ભૂતપૂર્વ નાયબ મુખ્ય પ્રધાન અને RJD વડા લાલુ યાદવના પુત્ર તેજસ્વી યાદવને ભાજપના સતીશ કુમાર યાદવથી સખત સ્પર્ધાનો સામનો કરવો પડ્યો જોકે તેજસ્વી યાદવે રાઘોપુરમાં લગભગ 12,000 મતોથી જીત મેળવી છે. ચાલો જાણીએ કે સતીશ યાદવ કોણ છે.
ભાજપના નેતા સતીશ કુમાર યાદવ જિલ્લા કાઉન્સિલર છે અને યાદવ સમુદાયના છે. તેમણે RJD સાથે તેમની રાજકીય કારકિર્દી શરૂ કરી હતી પરંતુ 2005 માં નીતિશ કુમારની આગેવાની હેઠળના જનતા દળ યુનાઇટેડ (JDU) માં જોડાયા હતા. તેમણે 2005 માં રાઘોપુરથી ભૂતપૂર્વ મુખ્ય પ્રધાન રાબડી દેવી સામે ચૂંટણી લડી હતી પરંતુ તેમની સામે હારી ગયા હતા. જોકે 2010 ની વિધાનસભા ચૂંટણીમાં તેમણે રાબડી દેવીને 13,06 મતોના માર્જિનથી હરાવ્યા હતા.
૨૦૧૫માં જેડીયુ મહાગઠબંધનમાં જોડાયા પછી તેઓ ભાજપમાં જોડાયા ત્યારબાદ રાઘોપુર બેઠક આરજેડીને ફાળવવામાં આવી. જોકે સતીશ કુમાર ભાજપ માટે આ હાઇ-પ્રોફાઇલ બેઠક જીતવામાં નિષ્ફળ ગયા અને ૨૨,૭૩૩ મતોથી હારી ગયા. ૨૦૨૦ની વિધાનસભા ચૂંટણીમાં તેમણે ફરી એકવાર રાઘોપુરથી પોતાનું નસીબ અજમાવ્યું અને તેજસ્વી યાદવ સામે ચૂંટણી લડી પરંતુ ૩૮,૧૭૪ મતોના માર્જિનથી હારી ગયા. સતીશ કુમાર યાદવ લાંબા સમયથી રાઘોપુરમાં સક્રિય છે અને લાલુ પરિવાર સામે ચૂંટણી લડી ચૂક્યા છે.
રાઘોપુર આરજેડીનો ગઢ છે
રાઘોપુર લાંબા સમયથી આરજેડી અને લાલુ પ્રસાદ યાદવના પરિવારનો ગઢ રહ્યો છે. ૧૯૯૫ અને ૨૦૦૦ની ચૂંટણીમાં લાલુ યાદવે આ બેઠક જીતી હતી જ્યારે તેમની પત્ની રાબડી દેવીએ ૨૦૦૦ની પેટાચૂંટણી અને ૨૦૦૫ની વિધાનસભા ચૂંટણી જીતી હતી. તેજસ્વીએ ૨૦૧૫ અને ૨૦૨૦ની વિધાનસભા ચૂંટણીમાં આ બેઠક જીતી હતી. વૈશાલી જિલ્લામાં આવતા રાઘોપુર વિધાનસભા ક્ષેત્રમાં યાદવો કુલ વસ્તીના 31 ટકા છે.
