આણંદ : આણંદના બાકરોલ ગામે રહેતી પરિણીતાને તેના પતિ સાથે ખટરાગ થતાં વાત છુટાછેડા સુધી પહોંચી હતી. જેમાં પતિએ અંગતપળો વાયરલ કરવાની ધમકી આપતા મામલો પોલીસ મથકે પહોંચ્યો હતો. આ અંગે સાયબર ક્રાઇમ પોલીસે ગુનો નોંધી વધુ તપાસ હાથ ધરી છે. બાકરોલ ગામે રહેતી 30 વર્ષિય યુવતીના લગ્ન મુંબઇ રહેતા અશોકસિંહ નામના વ્યક્તિ સાથે થયાં હતાં. જોકે, લગ્ન નક્કી થયા બાદ અશોકસિંહ વારંવાર બાકરોલ આવતો હતો અને યુવતી સાથે અલગ અલગ હોટલમાં રોકાતો હતો. આ સમયે તેણે તેના અંગત પળોના ફોટા અને વિડીયો લીધાં હતાં. બીજી તરફ લગ્ન બાદ મુંબઇ રહેવા ગયેલી યુવતીને કોઇ બાબતે અશોકસિંહ સાથે ઝઘડો થતાં તે પરત બાકરોલ રહેલા આવી ગઈ હતી. બાદમાં તેણે છુટાછેડા માટે કેસ દાખલ કર્યો હતો. આ વાતને લઇ અશોકસિંહ ઉશ્કેરાઇ ગયો હતો અને તેણે અંગતપળોના વિડિયો યુવતી અને તેના પરિવારજનોના મોબાઇલ પર મોકલી તેને વાયરલ કરવાની ધમકી આપી હતી. આ અંગે યુવતીએ સાયબર ક્રાઇમમાં ફરિયાદ આપતા પોલીસે અશોકસિંહ અને મોબાઇલ ધારક એમ બે વ્યક્તિ સામે ગુનો નોંધી વધુ તપાસ હાથ ધરી હતી.
