નવી દિલ્હીઃ અબજોપતિ ઉદ્યોગપતિ ગૌતમ અદાણી સંબંધિત કેસમાં અમેરિકામાં ધરપકડ વોરંટ જારી કરવામાં આવ્યું હોવાની પુષ્ટિ થઈ છે. અમેરિકન કોર્ટના આદેશ પર આ વોરંટ પણ અનસીલ કરવામાં આવ્યું છે.
સૂત્રોએ પુષ્ટિ કરી છે કે ગૌતમ અદાણી વિરુદ્ધ ધરપકડ વોરંટ જારી કરવામાં આવ્યું છે અને યુએસ કોર્ટે પણ તેને ખોલ્યું છે. વોરંટને અનસીલ કરવામાં આવ્યું છે જેથી કરીને આ દસ્તાવેજો વિદેશી કાયદાના અમલીકરણને પ્રદાન કરી શકાય. યુએસ કોર્ટના જજ રોબર્ટ એમ. લેવીએ 31 ઓક્ટોબર, 2024ના રોજ આ વોરંટ ખોલવાનો આદેશ આપ્યો હતો.
તમને જણાવી દઈએ કે ન્યૂયોર્કના ઈસ્ટર્ન ડિસ્ટ્રિક્ટના યુએસ એટર્નીએ ધરપકડ વોરંટ ખોલવા માટે અરજી કરી હતી. અરજીમાં ગૌતમ અદાણી સામેના કેસને આંશિક રીતે અનસીલ કરવાની અને વિદેશી કાયદાના અમલીકરણ માટે આ દસ્તાવેજો ઉપલબ્ધ કરાવવાના હેતુસર ધરપકડ વોરંટ ખોલવાની માંગ કરવામાં આવી હતી.
યુએસ જસ્ટિસ ડિપાર્ટમેન્ટ અને એસઈસીએ આરોપ લગાવ્યો છે કે અદાણીએ તેમની કંપની અદાણી ગ્રીન એનર્જી માટે સોલાર એનર્જી પ્રોજેક્ટ માટે કોન્ટ્રાક્ટ મેળવવા માટે ભારતીય અધિકારીઓને લાંચ આપી હતી.
ગૌતમ અદાણી સામે અમેરિકામાં શું આરોપ છે?
ગૌતમ અદાણી સામે અમેરિકામાં જે આરોપો લાગી રહ્યા છે તેની વાત કરીએ તો અમેરિકામાં ન્યૂયોર્કની ફેડરલ કોર્ટમાં સુનાવણી દરમિયાન ગૌતમ અદાણીની કંપની પર યુએસમાં રોકાણકારો સાથે છેતરપિંડી કરવાનો અને સોલર એનર્જી કોન્ટ્રાક્ટ મેળવવા માટે ભારતીય અધિકારીઓને મોટી લાંચ આપવાનો આરોપ લગાવવામાં આવ્યો છે.
