નડિયાદ: માતર – લિંબાસી રોડ ઉપર આવેલા પેટ્રોલ પંપ ઉપર કર્મચારીઓ સાથે તકરાર થયા બાદ ૪ યુવકો દ્વારા પેટ્રોલ પંપમાં તોડફોડ કરીને કર્મચારીઓને માર મારવામાં આવ્યો હતો. આ મામલે પોલીસે ૪ ઇસમો સામે ગુનો નોંધી તપાસ હાથ ધરી છે. માતર-લિંબાસી રોડ ઉપર આવેલા એક પેટ્રોલ પં૫ ઉપર રાત્રિના સમયે પેટ્રોલ પુરાવવા આવેલા યુવકો અને પેટ્રોલ પંપના કર્મચારીઓ વચ્ચે તકરાર થઇ હતી. જે ઉગ્ર બન્યા બાદ યુવકોએ પેટ્રોલ પંપમાં તોડફોડ કરીને, કર્મચારીઓને માર માર્યો હતો.
આ સમગ્ર ઘટના સીસીટીવીમાં કેદ થયા બાદ, તેના વિડીયો વાયરલ થતાં, પોલીસ દ્વારા તપાસ કરવામાં આવી હતી. આ મામલે પેટ્રોલ પંપના માલિક દ્વારા પોલીસમાં રજૂઆત કરવામાં આવી હતી. વિડીયોમાં ગભરાયેલો કર્મચારી પેટ્રોલ પંપમાં આવેલી કેબિનમાં પ્રવેશે છે અને પાછળથી હથિયારો સાથે યુવકો કાચ તોડીને કેબિનમાં પ્રવેશીને કર્મચારીને માર મારે છે, તે સ્પષ્ટ જોવા મળ્યું હતું. હાલમાં આ બાબતે પોલીસ દ્વારા તપાસ હાથ ધરવામાં આવી છે.
