ભારત અને દક્ષિણ આફ્રિકા (India And South Africa) વચ્ચે રમાયેલી શ્રેણીની ત્રીજી અને છેલ્લી મેચમાં ટીમ ઈન્ડિયા (Team India) 49 રનથી હારી ગઈ હતી. જો કે શ્રેણી હજુ પણ ટીમ ઈન્ડિયાએ કબજે કરી હતી. ભૂતપૂર્વ કેપ્ટન (Captain) વિરાટ કોહલી અને કેએલ રાહુલ છેલ્લી મેચમાં રમ્યા ન હતા. કેએલ રાહુલ આ ટીમ ઈન્ડિયાનો વાઇસ કેપ્ટન છે તેની ગેરહાજરીમાં છેલ્લી મેચમાં ઋષભ પંતને વાઇસ કેપ્ટન બનાવવામાં આવ્યો હતો. પરંતુ કેપ્ટન રોહિત શર્મા (Rohit Sharma) શૂન્ય પર આઉટ થતાં ફરી એકવાર પેવેલિયન પરત ફર્યો હતો. રોહિત શર્માએ હવે પૂર્વ કેપ્ટન વિરાટ કોહલીનો શરમજનક રેકોર્ડ તોડી નાખ્યો છે. જો કે કોઈ પણ કેપ્ટન ઈચ્છશે નહીં કે તે આ રેકોર્ડ બનાવે પરંતુ આવું અજાણતા થાય છે જેનો ભોગ રોહિત શર્મા બન્યો છે.
- સાઉથ આફ્રિકા સામેની છેલ્લી મેચમાં રોહિત શર્મા ખાતું પણ ખોલાવી શક્યો ન હતો
- ભારતીય કેપ્ટનોની લાંબી યાદીમાં માત્ર ત્રણ ખેલાડી જ ફુલ ટાઈમ કેપ્ટન રહ્યા છે
- કેપ્ટન તરીકે એમએસ ધોની ક્યારેય ટી-20 ઇન્ટરનેશનલમાં શૂન્ય પર આઉટ થયો ન હતો
રોહિત શર્મા ટીમ ઈન્ડિયાનો કેપ્ટન છે જે ટી20માં સૌથી વધુ વખત આઉટ થયો છે
ટીમ ઈન્ડિયાએ વર્ષ 2006થી ટી20 ઈન્ટરનેશનલ ક્રિકેટ રમવાનું શરૂ કર્યું ત્યારથી લઈને અત્યાર સુધી ભારતે ટી20માં ઘણા કેપ્ટન જોયા છે. પરંતુ લાંબા સમય સુધી ટીમ ઈન્ડિયાની કમાન સંભાળનાર ત્રણ કેપ્ટનોમાં એમએસ ધોની, વિરાટ કોહલી અને રોહિત શર્માનું નામ જ આવે છે. રોહિત શર્મા પહેલા વિરાટ કોહલી કેપ્ટન હતો. વિરાટ કોહલી તેની કપ્તાની હેઠળ T20 આંતરરાષ્ટ્રીય મેચોમાં ત્રણ વખત શૂન્ય પર આઉટ થયો હતો. આ દરમિયાન તેણે 46 ઇનિંગ્સ રમી હતી. જ્યારે રોહિત શર્મા 45 ઇનિંગ્સમાં ચાર વખત શૂન્ય પર આઉટ થનાર ભારતીય કેપ્ટન બની ગયો છે. એટલેકે કોહલી કરતા એક વાર વધુ. ખાસ વાત એ છે કે એમએસ ધોનીએ ટીમ ઈન્ડિયા માટે 62 ટી20 ઈન્ટરનેશનલ મેચોમાં કેપ્ટનશિપ કરી છે અને એક પણ વખત તે શૂન્ય પર આઉટ થયો નથી. અમે તમને જે આંકડાઓ જણાવી રહ્યા છીએ તેમાં માત્ર એવા કેપ્ટનોને સામેલ કરવામાં આવ્યા છે જેમણે ઓછામાં ઓછી દસ મેચમાં ભારતીય ટીમની કેપ્ટનશિપ કરી છે.
વીરેન્દ્ર સેહવાગ T20 ઈન્ટરનેશનલમાં ટીમ ઈન્ડિયાનો કેપ્ટન હતો
આ ત્રણ કેપ્ટન સિવાય પણ ઘણા એવા કેપ્ટન છે જેમણે ભારતીય ટીમની કમાન સંભાળી છે. ટીમ ઈન્ડિયાની પ્રથમ ટી20 ઈન્ટરનેશનલ મેચમાં વીરેન્દ્ર સેહવાગે કેપ્ટનશીપ સંભાળી હતી. જો કે તે જ મેચમાં તે કેપ્ટનશીપ કરી શક્યો હતો પરંતુ આ પછી પણ તેનું નામ ઈતિહાસમાં નોંધાયેલું છે કે ભારતનો પ્રથમ ટી20 કેપ્ટન સેહવાગ હતો. સેહવાગ ઉપરાંત સુરેશ રૈના, અજિંક્ય રહાણે, શિખર ધવન, ઋષભ પંત, હાર્દિક પંડ્યા, કેએલ રાહુલે પણ ભારતીય ટીમની કમાન સંભાળી છે. પરંતુ તેઓ ક્યારેય ફુલ ટાઈમ કેપ્ટન બન્યા નથી. જ્યારે ફુલ ટાઈમ કેપ્ટને આરામ લીધો હોય અથવા કોઈ મેચમાં અન્ય કારણે જો ન રમાય તો આ ખેલાડીઓ કેપ્ટન બન્યા હતા અને સારું પ્રદર્શન પણ કર્યું હતું.
